Shillong, Lber 30: Ka Khasi Students’ Union (KSU) Bangalore Unit ka pynpaw ba hadien ka jingpeit pyrman jong ka seng mynta la bun snem ka shem ba ki bun bha ki Educational Agencies kiba na Karnataka bad Meghalaya ki ju phah ia ki samla pule na Meghalaya sha Karnataka khamtam ha ka nongbah Bangalore.
Hynrei ka seng ka sngewsih pat ban iohi ba ki bun bha kum kine ki jaid Agencies ki mih tang ban kjit pisa na ki ba bun ki khynnah kiba lui lui da ka ba ki pynbiej bad phon ia ki ha kiba bun rukom.
Ka seng ka la lap ba kiba bun ki agencies ki pynbiej da kita ki education loans bad facilities ia ki samla pule na Meghalaya tang ban ioh kjit pisa na ki. Kiba bun bha ki samla pule na Meghalaya ki la shah thok shah phon ha kum kine ki jaid agencies.
Kine ki agencies kiba kular ia ki ban pynbiang ia ki ha ki jaka pule kiba pawnam bad ba tbit hynrei mar syn poi sha Bangalore kine ki samla pule ki ngat pynban ha ki jaka pule kiba wat da ka sorkar ruh kam pat ithuh ia ki.
Na ka liang jong ka seng ka maham tyngeh ia kine ki jaid agencies ba lada ki dang iai bteng ia kum kine ki kam thok kam shukor ka seng kam banse ban shim noh da ki lad ki lynti kiba tyngeh khnang ban tehlakam ia ka jingshah thok ki samla pule ba lui lui na jylla Meghalaya. La ong u Bah Rymphang Nongsiej president KSU Bangalore Unit ha ka kyrwoh kaba la phah sha ki lad pathai khubor mynta ka sngi.
