Shillong, Iaiong 27: Ia ka ophis jong ka Shillong Cantonment Board la sdang ban pyntreikam ha u snem 1885 bad mynta kala kynjoh sha ka 139 snem, ia ka la sdang tang ha dien 19 snem bala rah ia ka nongbah ka jylla Assam na Sohra sha Shillong ha u snem 1866.
Ki dohlieh na ri Bilat kila pynlong ia ka Sohra ha u snem 1832 kum ka nongbah jong ka jylla Assam Province, hynrei namar ka jingjur slap palat ha Sohra kila kynriah noh ia ka nongbah sha Shillong bad ha dien 19 snem ki sa shna ia ka Shillong Cantonment Board.
Ka kamram jong ka ka long ban peit ia ka khuid ka suba hapohki jaka kiba shong ba sah ki shipai, bad kane ka jingtrei kam kala iaid beit naduh kitei ki por jong ki phareng bad kala beteng haduh mynta ha ki jaka shipai na katei ka juh ka ophis kaba ha Rihno.
Ki jaka jong ka Shillong Cantonment Board la bynta ha ki ar bynta kiba dei ki jaka paidbah la peit jong ka kum ka iew na Anjelee Cinema sha Jaka ieng kali ha Iew Mawlong, ka Paltan Bazar, ka Jhalupara, katba kiwei ki bynta la peit da ka Defence Estate Officer jogn ki Shipai bad ka ophis ka don ha Narengi ha Guwahati.
