Shillong, Iaiong 26: Ka office jong u District Sports Officer ka East Khasi Hills District mynta ka sngi ka 26 tarik u Iaiong 2024 ka la ioh ban pynkut noh ia ka Inter School Athletic Meet 2024 ia ka ba la ioh ban pynlong ha poh ka SAI NEHU Shillong, hakaba la wan ban ia shim bynta da ki 47 tylli ki school na kylleng ka East khasi Hills District.
Ha kane ka jingpynkut ia ka inter School Athletic Meet la wan ban pynhap pyrda noh da u Shri Swapnil Tembe IAS u ba dei u Director of School & Literacy kum u kongsan ha ryngkat ka jingiadon lang u District Sports officer ka East Khasi Hills u bah O Mawthoh ki officers ka Tnad Sports bad kiwei kiwei.
Ha ba ai jingkren ha kane ka Inter School na ka liang u Shri Swapnil Tembe IAS u la ai ka jingkhublei sha ki nongpyniad school, ki Khynnah School ki ba la wan ban Ia shim bynta ha kane ka Inter School ha ka ba u la ong ba baroh ki ba ia shimbynta ha ki jingialeh kai sport ki don ia ka thong ban ia khun iwei ia I wei pat hynrei kim dei ban dei pat ban duh jingkyrmen lada ki jop ne ki rem ruh hynrei ki dei ban long ki bat rei shitom bad ban ia khun pat ha kawei pat ka por.
U la ong ruh ba ka ba ka jingialeh kai Sports ka long ka ba don kam ha ka ba ki school kim dei ban pyleit jingmut tang ha kine ki shi sngi ne ar sngi jong ka jingialeh kai hynrei ki ban pynlong baroh shi snem.
U Tembe u la ong ruh ba ki nongialeh kai sport ki don ia ka durkhmar ka bap huh samrikhie bad kaba dap da ka jingkmen la da ki don hakano kano ka jingeh.
U la ong ruh ba ki khynnah ki dei ban kham pyleit jingmut ha ka sapba kyrpang jong ki ha ka liang ka sport namar ba na ka liang ka sorkar ha kine ki sngi ka la ialeh kumno ban pynbiang ia ki lad ai jinghikai sha ki khynnah.
U Tembe u la kit bok kitrwiang ruh ia ki khynnah ia leh kai ba kin ioh ia ka met ka phat ka ba koit ba khiah bad ba kin dang lah ban pynleit jingmut ruh ha ka pule puthi jong ki.
Ha ba phai sha ka jingialeh kai ka school Army Public School Shillong ka la ioh ban rah ia ka nam lahduh ha ka liang ki shyngrang ki ba hapoh ka 14 da ka ba khur 2 tylli ki takma katba ka Loreto Convent ka la ioh ban khur ia nam laduh ha ka liang ki kynthei under 14 da 3 tylli ki Gold medals, 2 tylli silver bad 2 tylli ki bronze medals.
Ha ba phai sha ki under 16 na ka liang ki shynrang ka St Anthony Hr. Sec School ka la ioh ban rah ia ka nam lahduh da ka ba khur da 6 tylli ki Goald bad kawei ka Silver Medals. Katba na ka liang ki kynthei ka Garo Union School ka la ioh ban rah ia ka nam lahduh da ka ba khur 5 tylli ki Goald, bad kawei ka Bronze Medals.
Ha ba phai sha ki under 18 na ka liang ki shynrang la rah da ka H Elias Memorial Hr. Sec School I ka nam lahduh da ka ba khur 4 tylli Goald, kawei Silver bad kawei Bronze Medals, katba na ka liang ki kynthei ka St Mary’s Hr. Sec School ka la ioh ban rah ia ka nam lahduh da 6 tylli Goald bad 3 tylli Bronze Medals.
Ha ba phai sha ki khusnam ba marwei na ka liang u Donboklang R Marak na 1st MLP BN Secondary School u la ioh ban rah ia ka nam best Athlete na ki shynrang ha ka under 14, ka Amandy Rumnong na ka school Loreto Convent ka la ioh ban rah ia ka nam best Athlete under 14 ha ka liang ki kynthei.
Ha ka liang ki khynnah under 16 na ka liang ki shynrang u Betting Sangma bad na ki kynthei ka Kasanchi Marak na Garo Union School ki la ioh ban rah iaka Best Athete.
Kat ba ha ka under 18 na ka liang ki shynrang u Damebansan Rymbai u la ioh ban rah Ia ka nam best Athlete katba ka Shlichitra Malik ka la ioh ban rah ia ka best Athlete na ka liang ki kynthei.
