Shillong, Lber 24: Mynta ka sngi ka Eksamin matrik kaba la pyniaid da ka Meghalaya Board of School Education kala sdang mynta ka sngi, ha kane ka sngi sdang la iohi ba ki kmie ki kpa kila leit ban synran ia la ki jong ki khun sha ki jaka thoh eksam kaba ki iohi.
Na ka liang jogn ka seng United Hynniew Trep Movement lyngba u Public Secretary CEC Samla Moonstar Nongrem,bad Education Cell ka kitbok kit rwiang iaki khun samla ka Jaidbynriew kiba ialeh iaka Exam jongka Class 10,12 bad kiwei kiwei de ki exam haki Examination Board ba pher ba pher badon haka Jylla mynta u snem 2022.
Na ka liang jong ka seng ka Kyntu ia ki samla pule bakin trei shitom ban trei minot haki exam jongki bad ka Seng ka kitbok kit rwiang iaki ba kin ioh ia u soh ka jingjop bad wat hapdeng ka jingshah pynthud pynwit jong u Covid 19 hynrei kumba ong “U Blei u long ryngkat, u iarap bad kito ki briew kiba iarap ialade” .
Ka seng ka kyrmen skhem lyngba ka jingtrei shitom ka jingtrei minot bad khlem kynran dien ka jongki kan wanrah iaka burom iaka iing ka sem,ka kur ka jait,ka shnong ka thaw bad iaka Jaidbynriew hi baroh kawei bad khamtam kan long ka jingkyrkhu iaka lawei ka jong ki.
Ka seng UHM ka ong ba ki samla pule ki long ka ka jingkyrmen iaka jaidbynriew namar ka seng ka shem ruh ba ka jaibynriew Khasi ka la hiar arsut ha ka liang ka pule puthi, bad kham niar ruh ban shem ia ki samla Khasi jongngi ba kin pass ia ki kynja eksamin kiba kham heh kum ki Civil Services, IFS,IES bad kiwei kiwei .
Haba peit pat ia kiwei ki jaidbynriew, la iohi, ba ki la nang kiew shaphrang bad kane ka long ka jingma ia ka jaibynriew, namar ba lada kan iai long kumne satang lano ngin sa long kiba sahdien tam ha baroh ki liang napdeng ki jaidbynriew namar katkum ka juk ka jingnang jingstad ka long ka atiar kaba radbah tam ha ka ban kyntiew iaka roi ka par bad ban pynkhlain ia ka jaidbynriew.
