Shillong, Jymmang 22: Ka jingpynkhreh ia ka National Games hapoh ka jylla ka ban long ha u snem 2022 kala dang iaid sha khmat bad ban pynskhem ia kane ka jylla Meghalaya ka hap ban ia sign ia ka kontrak bad ka Indian Olympic Association (IOA) ryngkat bad ka Meghalaya Olympic Association.
Wat la ka jylla kala dep ban ioh ia ka jingpyntip ba ka National Games jong u snem 2022 kan long ha kane ka jylla, hynrei ban pynthikna ba ka jylla kam dei ban kynran dien na kane ka jingpynkhreh ka dang hap ban ia soi ia ka phainal kontrak ia kaba la tip kum ka “Hostcity Contract”.
Na ka liang jong ka Indian Olympic Association (IOA) mynta ka taiew kan sa pynpoi ia ka nuksa kaba ia dei bad ki kot ki sla ia kaba la tip kum ka “Hostcity contract” ynda la ioh ia ki kot ki sla jong kane ka sorkar kala lah ban iaid sha khmat ban pynkhreh ia ka National Games 2022 katkum ki kyndon.
U bah John Kharshiing president jong ka Meghalaya Olympic Association, haba kren ha u SP News Agency, u la ong ba ka jingpynkhreh kala iaid sha khmat hynrei ia ka dur ba pura kumno ban pyniaid sha khmat ia kane ka National Games kaban long ka burom ia ka jylla kan long ynda la dep ban ia soi ia ka “Hostcity Contract”.
Ia kane ka kontrak hap ban ia soi hapdeng ki lai tylli ki kynhun, ka IOA ka ban long ka nongpeit pyrman, ka MOA ka nongpyniaid bad ka sorkar jylla ka nongbah khlieh. Kumba ka long mynta ka jingpynkhreh ka long ban pynlong ia kane ka National Games ha ki 33 tylli ki jingialehkai hynrei ia kane ynsa tip shai ynda la ia soi ia ka “Hostcity Contract”.
