Shillong, Lber 08: Mynta ka sngi ka kynhun shipai suin jong ka Ri India kala pyni paidbah ia ka jingtbit jong ki shipai suin ka Ri India da kaba pynher nam ia ki lieng suin ia pom kynthup ia ki Helikopter mynta ka sngi kaba la pynlong ha Umiam ha Ri Bhoi District.
Ha kane ka sngi u Lat ka jylla u Phagu Chauhan u la ong u kongsan ban ia don lang ban ia sakhi lang ia kane ka sngi ha kaba ka Ri India ka pyni paidbah ia ka jingtbit ki shipai suin ka ri India, kum ka Sukhoi-30 MKI, Rafale and Chetak bad Cheetah Helicopters ha ka jingdon lang u myntri rangbah ka jylla u Conrad K Sangma.
Haba kren ha ki lat pathai khubor u myntri rangbah ka jylla u Conrad la ong ba kane ka dei ka sien kaba nyngkong ia u ban ia skhilang ha kaba pyni paidbah ia ka jingtbit ki shipai suin jong ka Ri India bad ym don ktien ban ong da kuwei pat ia ka jingtbit jong ki.
U myntri rangbah ka jylla u la ong ba ha ka kyrteng ki paidbah ka jylla u ai khublei ia ki bad kum ki paidbah ka Ri India ki sngewsarong ia ka jingtbit ka jong ki, ha ka juh ka por kane ka dei ka kabu ia ki khun samla ba kin ioh ia ka mynsiem ban rung sha ki kam shipai ban iada ia ka Ri.
Haba ia dei bad ka jingioh rung kam ki briew na ka jylla sha ki kam shipai, u myntri rangbah la ong ba ka long kaba shisha ba mynta ki kynhun shipai kila shim ia ka sien jam kaba kham sha khmat ban leit sha ki dong ki thian ban khring ia ki samla ban rung sha ka kam shipai ymd ei shuh tang ha Shillong.
La ong ba ki kynhun shipai bapher bapher kila ia kynduh ia u na ka por sha ka por bad ki juh pynsngew ia kane ka juh ka jingsngew kumba ia don lang bad ka jingiakren ka long ba kumno ban jam sha khmat ban pynshulur ia ki samla ban rung sha ki kam shipai bad u khmih mynti ba ha ki snem ban wan kin don shibun ki ban rung sha ka kam shipai.
Ha kane ka sngi la don lang ruh ki heh shipai na ka tnad shipai ia kaba la wan mih khmat da u Director General jong ka kynhun shipai Assam Riffle, ki heh shipai suin jong ka Eastern Air Command bad ki pulit jong ka jylla, ha ka jingiadon lang kiba ha iing ha sem jong ki shipai ban ia sakhi lang ia kane ka sngi kaba dei ruh ka sngi burom jong ki kynthei ha shityllup ka pyrthei.
