Mawmaram, Risaw 06: Mynta ka sngi ki paidbah nongshong shnong jong ka Mawmaram bad ka Kyllangjasap kila ia mih paidbah ban pyrshah ia ka jingthmu ban plié ia ka “Wine Store” ha katei ka jaka da ka kong Amyjone Mylliem Umlong kaba dei ka trai jong kane ka dukan kyiad phareng.
Ha kane ka sngi katei ka trai dukan kala plié ia kane ka wine store kaba la pynkynriah sha kawei ka jaka na kaba la don teng mynshuwa ha dien ba la mih ka rai ka iing bishar badon burom ban ki dukan kyiad kim dei ban jngai 200 meter na ka surok bah, na ki jaka mane blei bad na ki jaka pule. Hynrei ki paidbah ka shnong Mawmaram bad ka shong Kyllangjasap kila ia pyrshah.
Ha kane ka sngi, u sordar jong ka Sohphoh Pyrton u Bah DS Mawlong, uba la wan lang ban ia plié ia kane ka dukan kyiad u la kam ba kane ka jaka ka hap hapoh ka jingpyniaid jong ka shnong Sohphoh Pyrton kum ba u la ai ia ka No Objection Certificate (NOC) ban buh ia kane ka dukan kyiad phareng.
Hynrei na ka liang jong u sordar ka Mawmaram u Bah Sherbor L Mawlong u ba la wan ryngkat ki paidbah ban pyrshah ia kane ka jingplie ia kane ka dukan kyiad phareng u la kam bad kane ka jaka ba don kane ka dukan kyiad phareng ka hap hapoh ka jingpyniaid jong ka Mawmaram, ha kaba ka shnong ka pyrshah jur ban don kum kine ki dukan kyiad hapoh jong ka shnong.
Ha khmat kane ka dukan kyiad phareng kala mih ia ka jingiakren kaba jur hapdeng u sordar ka shnong Mawmaram bad u Sordar ka shnong Sohphoh Pyrton, la kum ban ia khynrup, haba ki pulit kiba la don lang ha kane ka kane ka sngi kila ioh ia kane ka jingia kynad ki la phah khang noh ia kane ka dukan kathaduh ban da ia pynbeit mano ba long trai ia kane ka jaka.
Ha kane ka sngi kala don ka jingiamih paidbah na ka shnong Mawmaram bad na ka shnong Sophoh Pyrton, ryngkat long kmie long kpa, ki khynnah skul jong kine ki ar tylli ki shnong ha kaba kila thoh ha ki placard ba kim kwah dukan kyiad.
Ki khynnah skul kila rah ruh ia ki lama iong ban pyrshah ban plié ia kane ka dukan kyiad, ha kaba la hap ban khang ia ki skul kiba don ha kine ki ar tylli ki shnong ban ia pyrshah ia kane ka jingthmu ban plié ia ka namar kane ka dukan ka dang ia jan bad ka iing mane bad ka skul hapoh jong kitei ki shnong.
