Shillong, Iaiong 18: U Nongialam jong ka People Democratic Forum (PDF) u Bah PN Syiem hapoh jong ka KHADC u la ong ba mynta ka sngi u la ioh pdiang ia ka shithi na u Dr Jemino Mawthoh General Secretary jong ka UDP, ha kaba u la thoh ba ka party UDP kala weng noh ia ka jingkyrshan ia ka EC hapoh jong ka KHADC.
Halor kane ka shithi kaba la phah da ka party UDP, u CEM jong ka KHADC u la ong ba yn sap hah kotpi sha ki MDC jong ka party UDP ban ioh ia ka jingmut ka jong ki. Namar kumba ka long ha District Council ka rai ka shnong ha ki MDC namar ka ain kyntiap seng kam don kumba ka long ia ki MLA. Ha ka juh ka por kam ktah ruh kata ka jingbat kam armaloi.
Ha kane ka EC synrop lang, ki MDC jong ka UDP ki don ar ngut Executive Member hapoh jong ka EC u Bah Donkupar Sumer bad u Bah Albinus Lyngdoh,hynrei kumba ka long haduh mynta kine ki ar ngut ki EM kim pat hiar na ka kam EM.
U Bah Pynshngiang u la kren shai ba ka rai jong ka party hapoh District Council kan nym trei kam namar ba kam don ka ain kyntiap seng bad ka kam bar ar maloi ruh kam trei kam. Ka shnong ha ki MDC shimet ban rai. Ia ka shithi kaba la phah da u general secretary jong ka party un phah kotpi sha ki MDC ban ioh ia ka jingmut kaba shai na ki MDC.
