Shillong, Lber.30: U MDC ka Jaiaw konstitwensi bad Working-President ka KHNAM, Bah Adelbert Nongrum u la ong ki artylli ki seng (KHNAM bad HSPDP) kin nym pynshai sha ka UDP haba iadei bad ka jingkynnoh ba u Bah Paul Lyngdoh u dei u kyrtong u bym don jingkyrmen ban ioh jingjop lada u iakhun ia ka ilekshon sha ka Lok Sabha na Shillong parliamentary seat.
U Bah Adelbert u la kren ia kitei ki kyntien haba kren ha ka jingialang ialap ilekshon ia u Dr PBM Basaiawmoit kyrtong shimet kaba la long ha Jaiaw Pdeng, hajan ka robert hospital hynnin ka sngi ha ka por janmiet.
“Ngi kloi ban ai ka jubab tangba ngim treh ban pynshai sha ka seng UDP namar ba ki kwah ba u trai uba long u kyrtong katei ka seng ba un leit ban pan ia ka jubab na ki, kin sa ai ia ka jubab kaba hun,” ong u Adelbert kum ka dak jong ka jingai jubab ia ka jingpan jingpynshai jong u General Secretary ka UDP, Bah Allantry Dkhar kaba dang shen halor ka jingkynnoh bym don jingkyrmen u Bah Paul ban ioh jingjop kum u kyrtong sha la ilekshon MP, Lok Sabha.
Kum ban shu pynkynmaw kine ki jingia kawang ktieh halor ki nongialam ka KHNAM bad HSPDP bad ki nongialam ka UDP ka la mih hadien ka jingpan tiket jong u Bah Paul Lyngdoh kum u kyrtong ka UDP sha ka ilekshon Lok Sabha na Shillong konstitwensi bad ka la kham jur shuh shuh hadien ba ka seng UDP ka la mynjur ban ai ia ka tiket khlem ka jingiasyllok.
Hashuwa ka UDP ka la mynjur ia ka jingtyrwa jong ka HSPDP bad ka KHNAM, kiba la tyrwa ba ka UDP kam dei ban pynieng ia u Bah Paul kum u kyrtong mon lang wat haba ki ruh ki la mynur ban nym ai jingkyrshan ia u Bah PBM Basaiawmoit uba ki la rai shuwa ban long kum u kyrtong mon lang.
Nalorkata u Bah Adelbert u la pynshai ruh ia ka jingkynnoh kaba iadei halor ka jingbym don mon jong ki artylli ki seng ban tylli kum ki seng riewlum, ha kaba u la ong, ngim kwah ban iatylli kum ha ki por jong ka Regional Party Alliance (RPA) kaba ‘PRA’ pat tang hadien katto katne por namar kato ka jingiatylli kadei tang da ka ktien ym da ki kam.
“Ngi kloi ban iatylli lada kadei na bynta ka jaitbynriew bad na bynta ka ri hynrei ym na bynta ka shuki,” la ong u Working president ka KHNAM.
Kiwei pat kiba la ai jingkren ha katei ka jingialang ki kynthup ia u kyrtong mon lang uba long u kyrtong shimet, Bah PBM Basaiawmoit, MLA bad Vice President ka HSPDP, Bah Ardent Basaiawmoit bad u MDC ka MAwkhar, Ban James Ban Basaiawmoit.(SP News)
