Shillong, Naiwieng 19: U IG jong ki BSF u ba la ialam ia ka kynhun sha ka jingialang kaba la long ha Bangladesh na duh ka 15 tarik haduh ka 18 tarik u la kren shai kdar sha ki heh jong ka BBG ka kynhun shipai jong ka Bangladesh baki lehnoh ka dong shatei lam mih ngi jong ka Ri India kum ka GNLA, ULFA, HNLC, NDFB, NLFT ki don ha Bangladesh.
Kane ka jingialang kaba la jun pynlong ha pdeng kine ki ar tylli ki ring ia kaba la tip kum ka “Border Coordination Conference” u tei u heh jong ki BSF u la ong ba kane kam dei tang ka jingkynnoh hynrei ki don ia ki sabut kiba biang ban ong ba kitei ki lehnoh ki don ha Bangladesh. Bad dei kine kiba la pynrung ia ki pisa thok sha kane ka Ri India bad ia ki kam sniew kiba laiphew jait ha khappud.
Ha kane ka jingialang la ia kren ruh ban thaw ia kawei ka kynhun shipai ban ia peit ha ki khappud ia kaba ynjer kyrteng da ka “Single Row Fence” ki ban peit tang ia ki khappud kiba hapoh ka 150 kam ha khappud. Ha kane ka jingialang la ia mynjur lang ba kin ia treilang ban peit ia ki jingeh ha khappud jong kine ki ar tylli ki ri.
Ha kane ka jingialang na ka liang jong ki BBG ruh kila ong ba ki nong India kila pyniap bein ia ki briew jong ka Bangladesh kiba don ha khappud bad ka jingkhaii ia ki mar dih pynbuiaid kala jur bha na kane ka Ri sha Bangladesh. Halor kane na ka liang jong ki BSF ki la ong ia ki BBG ba kin ong ia la ki jong ki briew ba kim dei banrung sha u pud u sam jong ka Ri India.
