Shillong, Lber 16: U Myntri ba dei peit ia ka tnad pule u bah Lahkmen Rymbui haba jubab ia ka jingkylli jong u bah Himalaya M Shangpliang ha kaba ia dei bad ki skul Eklavya Model Residential Schools (EMRS) u la ka sorkar kala ioh ia ka jingmang pisa na ka bynta kine ki skul.
U myntri u la iathuh hapoh ka ing dorbar ka long ba na ki 40 tylli ki ing skul ar tylli la pyntrei da ka tnad pule puthi, 13 tylli la ai sha ka Water and Power Consultancy Service Ltd bad 25 tylli sha ka Manipur Industrial development Corporation Ltd, ia mynta kiba la sdang ban trei ki long ha Samanda ha EGH District bad ha Pahamsyiem Ri Bhoi katba ia kiwei pat ka jingpynkhreh ka dang iaid sha khmat.
Haba jubab ia ki jingkylli bynrap na ka liang jong u myntri u la iathuh hapoh ka iing dorbar ba ka sorkar kala thoh sha ka MeECL, MGCC, MIDC ba kin ia shim bynta ha ka EoI kaba la khot da ka sorkar pdeng hynrei kine kim shym la lah ban leh ia kata namar ka dei ka por ba dang pyrkhing bha ha ka jingialeh pyrshah ia u COVID-19.
Haba ia dei bad kane ka sorar jylla kala thoh sha ka sorkar pdeng ba kan pyrkhat ia kane ka kam, hynrei haduh mynta ym pat ioh ia ka jubab na ka sorkar pdeng, haba ia dei bad kane u myntri rangbah ka jylla ruh u la shim khia.
Haba ia dei bad ka jingpyniaid ia kine ki skul ka long ba ka sorkar pdeng kan bei pisa na ka bynta san snem bad ha dien ka san snem ki sorkar jylla kin hap ban shimti ban pyniaid ia kine ki skul.
