Shillong, Iaiong 29: Ki khatlai tylli ki seng bhalang mynta ka sngi ha ka jingiakren bad ka sorkar halor ka ILP kila ai da ka jingthoh kaba kynthup ia ki 10 tylli ki mat jingdawa ba ka sorkar ka dei ban pyntrei kam kumno ban khanglad ia ka jingwan jong ki briew kiba na bar sha kane ka jylla.
Kine ki shiphew tylli ki mat jingdawa kiba la ai da ki seng bhalang ka long katkum ka Eastern Bengal Frontier Regulation Act, 1873.
U Myntri rangbah ka jylla u la pdiang ia kine ki jingai jingmud jong ki seng bhalang bad u la ong ba mynta kala dei ka kamram jong ka sorkar kumno ban pynlong ai ia ki ban pyntrei kam na ka bynta ban khanglad ia ka jingwan tuid jong ki briew kiba na bar.
U Bah Joe Marwein u la ong ba ki khatlai tylli ki seng bhalang kila ai ia ki mat jingdawa jong ki sha ka sorkar mynta ka sngi haduh 10 tylli. U Bah Sadon K Blah u la ong ba kane ka jingai jingmud jong ki ka long kham bha ban ia ka ILP kaba mynta.
Ki la ai jingmud sha ka sorkar ba dei ban pyntrei kam ia kane ka ILP katkum ki kyndon ain kiba hapoh ka jong peit jong ka sorkar jylla. Baroh kiba don ia ka ILP ki dei ban pyni sha ki dorbar shnong.
Na ka bynta ki samla pule bad ki nongtrei sorkar ki dei ban ai tang shisien ha duh ba kin da pyndep ia ka jingpule jong ki lane haduh ba kan da kut ka por trei kam ka jong ki lada ki dei ki nongtrei jong ka sorkar pdeng.
Na ka liang jong u myntri rangbah u la ai ka jingiaroh ia ka jinglah jong ki seng bhalang ban wanrah ia ki mat trei kam kiba biang bad kane ka jingai jingmud jong ki ka long kaba biang ban iada na ka jingwan kyrthep jong ki briew kiba na bar.
Ka sorkar mynta kan sa pynwan dur ia kine ki jingai jingmud khang ba kin nym ia tyngkhuh bad ki ain kiba la shna da ka sorkar pdeng lane kiba ia tyngkhuh bad ka riti synshar jong ka Ri khlem da ktah ia ka hok jong u ne ka briew.
Ka sorkar mynta kan sa leh ia ka kamram jong ka ban peit ba yn lah ban pyntrei kam ia kane ka jingai jingmut khang ban lah ban teh lakam ia ka jingwan rung jong ki briew ba na bar.(SP News)
