Shillong, Jylliew 15: Ka seng Hynniewtrep Youth Council (HYC) mynta ka sngi kala phah da ka dorkhas sha u myntri rangbah ka jylla Meghalaya u Dr Mukul Sangma ban dawa na ka sorkar ban ong ba ka sorkar ka dei ban sangeh noh ia ka jingshna ia ka lynti rel hapoh jong ka Ri Bhoi District, ka seng kala kren shai ba ka pyrshah ia kano kano ka jingthmu ban shna ia ka lynti rel.
Na ka liang jong ka HYC ha kane ka dorkhas kala ong ba ka seng kam shym iohi ba ka sorkar kam shym don kano kano ka jingshim khia ha kaban teh la kam ia ka jingwan rung kyrthep jong ki briew kiba na bar bad ka HYC ka kynnoh ba ka sorkar kala leh sting ia kane ka kam ban ia da ia ki ri paid jong kane ka jylla bad ka jingwan ka lynti rel ka long tang ban wan lam shuh ia ki briew kiba na bar sha kane ka jylla.
Na ka liang jong ka HYC ka ong ba lada ka sorkar kam pat lah ban wanrah ia ki ain ban tehlakam ia ka jingwan jong ki mynder ri bad ban pyntrei kam ia ki na ka bynta ban iaida ia ki trai jylla na ka liang jong ka HYC kan ieng ban pyrshah ia ka jingshna ia ka lynti rel ha Ri Khasi Jaintia.
Haba ia dei bad kane na ka liang jong ka seng ka dawa na ka sorkar ba ka dei ban phah pynsangeh mar dor ia kane ka jingshna ia ka lynti rel ha ka jylla, ha poh Byrni hapoh jong ka Ri Bhoi District. Ia kane ka dorkhas kaba la phah sha u myntri rangbah la soi da u Bah Peter J Lawai president bad u Genenral Secretary jong ka seng u Bah Robertjune Kharjahrin.
