Shillong, Lber 06: Ka Khasi Students’ Union lyngba ka Employment Monitoring Cell ka la phah dorkhas sha ka MPSC halor ki katto katne ki jingujor ba la ioh na ki samla thep kam ha ki post bapher bapher bad katto katne ki mat ban pynbha bad pynwandur halor ka thung kam thung jam.
Nyngkong ha kaba iadei bad ka post Junior Divisional Accountant (JDA) hapoh ka Directorate of Account & Treasuries, Meghalaya. Katkum ka jingpynlait advertisement, ladon 69 tylli ki post ba lait, hynrei ha ka por ba mih ia ka result eksamin la iohi ba don tang 34 ngut.
Ha kaba iadei bad kane ka bynta na ka liang ka MPSC ka la pynshai ba ladon tang 34 ngut kiba pass ia kane ka eksamin te ki lah ban khot interviw tang ia kine hi 34 ngut. Haba kylli halor ka jingbym pass ki samla.
Na ka liang u Secretary ka MPSC ula pynshai ba lehse kadei ka pass mark ba heh ba la buh na ka liang ka Directorate of Account bad Treasuries kaba pynlong ba ki samla kim shim lah ban pass namar ba ianujor bad kiwei kiwei ki tnad sorkar ki buh ia ka qualifying marks tang 33 marks bad kiba wan shakhmat kin shah jied. Bad halor kane ka bynta ka Seng kan ia kynduh bad ka Directorate ban pynsngew ia kine ki jingeh jong ki samla.
Ba ar halor ka kam Typist (Ordinary Grade) ha Meghalaya (Civil) Secretariat bad Heads of Department. Ia kane ka kam la pynlait advertisement ha u snem 2016 na bynta 36 tylli ki post hynrei haduh mynta ka dang sah teng wat lada ka ladep eksamin bad typing test.
Na ka liang ka MPSC kala pynshai ba kala long kaba la khreh halor kane kam bad ban pynlait noh ki result hynrei ka dang ap tang ia ka roster ba ka SAD Dept kin phah.
Na ka liang ka Seng ka pynrem ia ka SAD Dept ka bym shim la lah ban phah ia ka roster haduh mynta bad pynsahteng ia kane ka kam. Ha kine ki sngi, ka Seng kan leit ujor sha ka tnad ba dei peit ban phah noh ka roster bad ki samla ki nym shu sakma ka ap sah.
Ba lai halor ka jingsuki ka thung kam thung jam ba la pyniaid da ka MPSC. Na ka por sha ka por, ka Seng ka ju lap ba ki samla thep kam ki hap ban ap haduh 4-5 snem ba ka recruitment process kan dep.
Kane ka pynduhnong shibun ia ki samla kiba ap kam namar ka rta ruh ka nang iaid bad na ka liang ki samla kiba pass man u snem ruh ki shu ap khlem don kano kano ka lad ban thep kam. Na ka liang ka Seng ka la ai jingmut ba ia kino kino ki kam kiba pynbna paidbah (advertised) dei ban pyndep noh hapoh 1 snem na ka tarik ba la advertised.
Ba saw, ka Seng ka la dawa ruh ba na bynta ki Grade ne Group B, C bad D dei ban pynduh noh ia ka personal interview. Ka Seng ka ju ioh ia ka jingujor man la ka por ba ka don ka jingbamsap ha ka thung kam thung jam bad ka jingleh shiliang ha ka por personal interview.
Na ka liang ka Seng ka sngew ba kam shim myntoi ban don ka personal interview na bynta kine ki grade ne group. Wat ha ki kam sorkar pdeng ka personal interview lah pynduh noh bad kiwei kiwei ki jylla ruh ki la ia bud ia kata, te balei ba ka Sorkar Meghalaya haduh mynta ka dang leh ka personal interview halor kine ki post ne grade bad dei ban weng noh bad ka thung kam thung jam kan long kaba khuid.
Ba san, halor ka personal interview na bynta ki Grade ne Group A, ka Seng naduh ki snem ba ladep kala buh ia ka jingdawa ba ka personal interview kadei ban long ha ki jingdon ki camera ban lait na ka jinglehtuh jingleh shukor kumba la ju iohsngew na ki por sha ki por. Ka Seng ka pynsngew biang ka thung kam ka thung jam hapoh ka jylla ka dei ban long kaba khuid khnang ba ka jylla baroh kawei hi kan kiew.
Halor kine ki mat, na ka liang ka MPSC ka la pynshai ba ka shong ha ka mon jong ka Sorkar ban leh ia kine kiei kiei baroh bad na ka liang ka MPSC kam shim don kano kano ka jingpyrshah. Ka Seng ha kine ki khyndiat sngi kan sa buh ia ka jingdawa ha khmat ba Sorkar ban pynurlong noh ia ka jingdawa ka Seng.
