Shillong, Risaw 03: Ki pulit jong ka Pastuer Beat House ha ka 14.9.2016 kila ioh ia ka jingujor ba kawei ka khynnah kynthei kaba dang rit ka rta kala jah na ka jaka sah jong ka ha Pynthoumkhrah bad kala don ka jingsuba ba u Anil Haque u ba na kane ka juh ka jaka u la rah bor ia ka.
Halor kane ka jingkynnoh ki pulit kila leit sha Barundanga police station jong ka Tamarhat District hapoh jong ka jylla Assam hapoh ka jingialam jong u SI K P Singh ha kaba kila pynlong ia ka jingkhynra ha katei ka jaka da ka jingiatreilang bad ki pulit Assam ha kaba la lah ban pynlait ia kane ka khynnah.
Haba u Anil Haque u la iohi ia ka jingwan jong ki pulit ula ialeh ban phet sha khlaw hynrei u la shah bat ha ki pulit, ha ka jingtohkit jong ki pulit na kane ka khynnah kaba la shah rahbor ha u Anil, la ong ba la pynbor ia ka ba kan ia shong kurim bad u Anil Haque.
