Jowai, Iaiong 20: Ka AJYWO Central Body ka iaroh ia ki pulit jong ka Jowai Police Station halor ka jingtrei shitom halor ka jingioh kem noh ia u Ioannis Pala u ba dei u Chairman jong ka Pala Group kawei na ki Non-Banking Finance Company (NBFC) kaba trei kam ha West Jaintia Hills District tad haduh u snem 2013, ka company hapoh ka jingialam u Ioannis Pala kaba la shah kynnoh ba ka la bam klop da ki phew lak ia ka pisa ba la kynshew da ki paidbah ha katei ka kompani.
Kum ban shu pynkynmaw, hadien ba ki nongtrei bad ki nongthep pisa jong ka komapni ba la tip kum ka Pala Group kaba don ha Jowai, ba ki la shah thok ha katei ka kompani da ka jingbym siew shuh jong ka ia ka pisa jong ki paidbah ia kaba ki la kynshew ha katei ka kompani, ki la wan ud sha ka seng AJYWO Central Body bad dei ha ka 11 tarik u June , 2013 ba ka AJYWO kam banse ban ujor syndon noh da ka FIR pyrshah ia katei ka kompani ha Jowai Police Station halor ka jingshah kynnoh jong katei ka kompani ha ki paidbah da kaba ai kopi ruh ia ka jingujor jong ka seng sha u Deputy Commissioner bad ruh sha u Superintendent of Police jong ka jong ka West Jaintia Hills District bad ruh iai bud dien bun sien ia kane ka kam thok jong katei ka kompani ia ki paidbah.
“Ngi pynpaw ia ka jingsngewnguh haduh katta katta ia u Officer Incharge jong ka Jowai Police Station ha ryngkat bad ka kynhun jong u baroh kawei bad ruh ia u Superintendent jong ka West Jaintia Hills bad ka team jong u baroh kawei halor ka jingtrei shitom jong ki kat haduh ba la ioh kem noh ia u Ioannis Pala u ba la shah kynnoh thok ha kaba bam klop ia ka pisa jong ki paidbah ba lui lui ba pli ki bym tip eiei halor ka jingthmu ba sniew ba don sha lyndet jong katei ka company Pala Group” ong u Bah M H Dkhar, President jong ka AJYWO Central Body.
“Ka seng ka kyntu ruh ia ki pulit bad ruh ia ki bor jong ka aiñ ha West Jaintia Hills District ban thwet bad kem lut ia baroh kito ki ba don kti bad u Ioannis Pala lyngba jong katei ka company jong u ban halor ki kam thok kam shukor jong ki ia u paidbah bad ruh ban ai ia ka jingpynsaja ia ki kat kum ki kyndon jong ka aiñ ki ba iadei bad kitei ki jingshah kynnoh thok jong katei ka kompani Pala Group. Ong u Bah M H Dkhar, President jong ka AJYWO Central Body.
“Shuh shuh, u bah M Dkhar u la ong ba ba ka jingioh kem jong ki pulit jong ka Jowai Police Station ia utei u heh duh jong ka Pala Group wat la hadien 4 snem jong ka jingphet rieh jong u na ka kti ki pulit ka da ai mynsiem shibun eh ia ki paidbah ba tip ba pleng ki pulit kim ju shong kli kti ban thwet ia kino kino ki nongleh kam bymman. “Ngi da iaroh shisha haduh katta katta ia kane ka jingtrei shitom jong ki pulit ka Jowai Police Station kat haduh ba ki la ioh kem ia u Ioannis Pala, u Khlieh duh jong ka Pala Group” pynpaw shuh shuh u Bah M. H Dkhar.
“Ka seng ka kyntu ruh ia ki paidbah jong ka Jaintia Hills ba ki dei ban long ki ba husiar bha na ki ba kym kine ki jaid kompani thok ba beaiñ ba kim dei ban shah pynngop ha ki jingkular jong ki ia ki sut ki ba heh na ka bynta jong ki lada ki thep pisa ha ki. Ha ka juh ka por ruh ka seng ka kyntu ia ki paidbah jong ka Jaintia Hills ba lada ki dang lap ia kiba kum kine ki jaid company kiba thok kiba leh mynleh kum ki bank la da ki dang don ha Jaintia Hills, ki dei ban pyntip wut wut sha ka seng khnang ba ka seng kan ioh ban leh ia kaba donkam na ka bynta ka bha ka miat jong u paidbah,” la pynkut u Bah Dkhar.
