Laitlyngkot Risaw 27: U Bah Vincent H Pala MP jong ka 2-Shillong parliamentary constituency u la plié ia ka jingrakhe Golden Jubilee jong ka skul St, Peter Secondary School Laitlyngkot hadpeng ka jingiphuh iphing ha kaba ki kmie ki kpa jong ki khynnah skul ruh kila ia wan ban ia sakhi lang ia kane ka sngi kaba khraw.
Ha ka jingkren jong u Bah Pala kum u kongsan, u la ong ba ka jingnang jingstad ha kane ka juk kaba mynta ka long kaei kaei kaba don kam, u kyntu ia ki khynnah skul jong kane ka skul ba kin don ia ka thong ha ka jingim jong ki bad u dong ka jingkyrmen ba na kane ka skul kin mih ki riew khraw ha ki ba bun ki liang.
U la ong ba na ka liang jong u u kloi ban ia treilang bad ki bor ba dei peit ia kane ka skul, u MLA , u MDC bad kum juh ki sordar shnong kane ka thain ban ia trei ryngkat ryngkat bad u don ka jingkyrmen ba ha kine ki snem ban sa kane ka skul kan poi sha ka kyrdan jong ka college.
U Bah Titosstarwell Chyne u ba dei u MLA jong kane ka jaka ha ka jingkren ka jong u la ong ba kum u nongmih khmat na kane ka dong bad ka thain u don ban ia trei ryngkat ryngkat ban kyntiew ia ka ha kiba bun ki liang. U la ong ba kam dei kaba suk ia ki nongpyniaid ia kane ka skul ha duh ba kan da dap mynta 50 snem.
Ia kane ka skul ka sdang ha u snem 1967 bad kala iaid ter ter wat hapdeng ki jingeh kiba bun bad mynta ka sngi la ioh ban plié ia kane ka jingrakhe ia ka jingdap san phew snem jong ka skul hapdeng ka jingishongkun. Ha kane ka sngi u Vicar General jong ka Arch Diocese Shillong u phadar J Madur ruh u la ia don lang.
Ha kane ka sngi la don ki jingshad na ki khynnah skul bad ki khynnah skul ba rim ruh kila ia don lang ban sakhi ia kane ka sngi. Ia ka history jong kane ka skul la pule da u Bah SR Majaw. U MDC jong kane ka jaka u Bah Jansing M Tynsong ruh u la ia don lang. Ia ka lama jong ka jingrakhe ia ka Golden Jubilee la pynher da u kongsan u Bah Pala.
