Shillong, November 25: u Bah Pynshngianlang N Syem Chief Executive Member jong ka KHADC mynta ka sngi la plié ia ka kynhun iamir jngmut ia kaba la ai kyrteng ‘Campaign for Change’. Ha kane ka sngi la plié ruh ia ka website www.campaignforchange.org.in hapdeng ka jingiadon lang ki para MDC kiba don hapoh jong ka PDF ha KHADC.
Haba kren ha kane ka jingplie ia kane ka kynhun ia mir jingmut, u bah PN Syiem u la ong ba ki paidbah jong ka jylla mynta ki don ha pdeng ka jinglynga kaba khraw shano ban phai bad shno ban leit, dei na kane ka daw la thaw ia kane ka kynhun hapoh ka jingialam jong u bah Jana Kharier kum u Chairman.
Kane ka jingkynhun mynta ka pan jingmut na ki paidbah, halor kiba bun ki bynta la ka long ha ka sainpyrthei, ha ka imlang sahlang bad ka khaii pateng. Ki briew ki lah ban ai ia ki jingmut ki jong ki sha kane ka kynhun da kaba phah ia ki jingthoh lane ki lah ban leit ban ia kynduh hapoh ka ophis jong kane ka kynhun ha Nongrim Hills Shillong.
Kane ka kynhun ‘Campaign for Change’ mynta kan shim ia baroh ki lad ki lynti ban pynpoi sha ki paidbah ia ka jingmut jong kane ka kynhun, da kaba thoh lyngbaki lad pathai khubor, ki jingialang paidbah bad kiwei kiwei ki lad ki lynti ban pynpoi ia kaei kaba ki thmu sha ki paidbah.
Ki paidbah ki lah ban ia jingmut sha kane ka kynhun da ki jingthoh ne da kano kano ka rukom ha kaba ia dei bad ki mat bapher bapher kaba ki sngew ba ki sorkar ha ki snem kiban wan ki hap ban leh na ka bynta jong ki paidbah, la ka long ha ka ioh kam ioh jam, ka rep ka riang ka khaii pateng bad ha ka synsahr khaddar.
Kiwei ki para MDC kiba la ia don lang ha kane ka sngi ki long u Bah LG Nongsiej , u Bah Hedrian Lyngdoh, u Bah Latilang Kharkongor, u Bah Banteidor Lyngdoh bad kiwei kiwei ki riew rangbah. La kyntu ia ki paidbah ba kino kino kiba kwah ban ia don bynta lang bad kane ka kynhun ki lah ban pyniasoh ia la de.
