Shillong, Nailar 25: U myntri rangbah ka jylla u Dr Mukul Sangma mynta ka sngi u la plié ia ka Meribon K.H. Memorial College, ha Sohiong. Na ka liang jong u myntri rangbah u la ai khublei kyrpang iaki paidbah jong ka shnong Sohiong kaba kila lah ban seng ia kane ka college bad kane ka long ka burom na ka bynta ka jylla hi baroh kawei.
U myntri rangbah u la ong ba ia ki skul mynshuwa la pyniaid da ki District Council, hynrei mynta ka sorkar pdeng bad ka sorkar jylla kila shim khia kumno ban kyntiew ia ka pule puthi ha ka jylla, mynshuwa ka don ka por ba hap ban pynbor ia ki briew ban leit sha ki jaka pulr hynrei mynta pat ka por kala dei ban pynbha ia ka rukom hikai ha ki jaka pule.
Kumba ka long mynta baroh baroh ki iabeh ban pule sha ki jaka sor bad kane kala wanrah ia ka jingkhap ngiah kumta ka por kala dei ban pyniar ia kine ki jingpule sha ki jaka nongkyndong da kaba plié iaki tand pule baroh kum ka Science bad ka Commerce. Ka sorkar kan plié kawei ka college Commerce bad Science, ha Mawphlang bad kawei ha Mahendraganj. Ka sorkar kan plié ruh kawei ka Model College bad ia ka jaka ladep ioh ka long ha pdeng ka Mairang bad Kynshi ha West KHasi Hills.
Haba ialeh ban wanrah ia ka jinghikai kaba biang tam ha kane ka jylla na ka liang jong u myntri rangbah u la ong ba ka sorkar da lei lei kan nym lah ban pynhiar dor ha kaba thung ia ki nonghikai, ka sorkar kan thung ia kiba tbit tam bad kiwei ki jaka ai jinghikai ruh ki dei ban but ia kane. Ha kane ka sngi la pynbna ruh ban plié ia ka Sohiong C& RD Block bad ia ka iew bun mala ha kaba la dep ban mang haduh T.30 klur tyngka.
Ia kane ka college la pyniaid da ka HDR Educational Trust bad kane ka long ban pynurlong ia ka jingkular kaba la ai ha u paidbah ia kane ka college la jer kyrteng ka kmie rad jong u Bah HDR Lyngdoh u ba dei u MLA jong kane ka jaka ha ka juh ka por ruh u myntri ha kane ka sorkar jylla. Ia kane ka college dang shu sdang ha ka 21 tarik jong Naitung mynta u snem bad la pyniasoh bad ka Shillong College namar ka dang ap ia ka jingbit na ka NEHU.
Kiwei kiba la ia don lang ha kane ka sngi ki long u Bah HDR Lyngdoh MLA jong kane ka jaka u ba la air uh ia ka jingkren bad kiwei ki myntri sorkar kong Roshan Warjri, u Bah Julius Dorphang, MLA, Bah John F Kharshiing bd shin bun ki riew rangbah kane ka thain kila ia don lang ban skhi ia kane ka sngi.
