Shillong, Lber 07: Mynta ka sngi u bah Prestone Tynsong symbut myntri rangbah ka jylla ba dei peit ruh ia ka tnad District Council Affair u la plie paidbah ia ka Monolith Festival 2024 ka ban long lai sngi lynter ha Khasi Heritage Village kaba don ha poh ka Hima Mawphlang ia kaba la pynlong da ka Khasi Hills Autonomous District Council (KHADC) ia kaba la sdang mynta ka sngi kan kut ha ka 9 tarik sngi Saitjian ban wan.
Ha ka jingkren jong u bah Prestone haba plie ia kane ka tamasa kaba lai sngi ban pyninam ia ki riti dustur bad ki shad tynrai na ki 54 tylli ki hima, u la ong ba ka sorkar jylla bad ki lai tylli ki District Council ki ia trei lang ban pynneh pynsah ia ki riti dustur katkum ka khyrngit kaba hynriew jong ka riti synshar jong ka Ri India.
La kyntu ia ka KHADC ban iai bteng ban pynlong kum kine ki tamasa, kane ka tamasa ka long ban pyninam ia ki shad tynrai bad ha ka juh ka por ka long la lat ia ki khun samla ban pynisha ka pyrthei ia ka sap ka phong kaba ki don ha kaba ia dei bad ka shad tynrai jong ki dong bad ki thain kane ka ri Khasi h kaba ki Mawbyna ki don kylleng.
U Chief Executive Member jong ka KHADC u bah Pyniaid Sing Syiem la ha ka jingkren ka jong u la ong ba kane ka tamasa kan long ka jaka ban pyninam ia ki riti dustur bad ka shad tynrai jong ki hima bapher bapher na ki 54 tylli kiba hap hapoh ka jingpeit jong ka KHDC.
Ha kane ka sngi u CEM jong ka KHADC la ong ba na ka liang jong ka KHADC kand ang ialeh ban pynkhlain shuh shuh ia ka Khasi Social Customs Lineage Act, 1997, ban pynneh pynsah ia kaei kaba la ioh pateng na ki kmi ki kpa tynmen ia kaba la pynneh pynsah haduh mynta mynne. Kane ka tamsa ka long ban pyninam sha ka pyrthei ia ka riti dustur.
Ha kane ka sngi la don lang u Symbut CEM jong ka KHADC, u bah Pynshngianlang Syiem, ki Executive Member jong ka KHADC, ki MLA ki khlieh nongsynshar na ki hima bapher bapher, ki rangbah shnong bad kiba khraw batri jong ki hima bapher bapher kila don lang ha kane ka sngi sdang jong ka lehkman Monolith Festival 2024 ha Mawphlang.
