Shillong, Rymphang 02: ka Crowbrough hotel kaba don ha khyndaitlad kala long ka jinglehrain ban ioh ioh ba ka sorkar kam lah ban pyndep shuh ia ka mynta la palat phew snem, ha kane ka kynti kaba mynta ruh kane ka hotel kala poi biang sha ka kynrum kynram, ha kaba ka Meghalaya Tourism Development Corporation (MTDC) kala hap ban thung ia u Arbitrator ban pynbeit ia ka jingeh.
Ban ia pynbeit ia ki kynrum kynram kaba la mih ha pdeng u Bah Lessly Shylla u nongshimwai ia kane ka Hotel bad ka MTDC, na ka liang jong ka Corporation ka la thung ia u nongbishar bala shongthait jong ka Guwahati High Court u Justice B K Sharma bay n bishar ia kine ki arliang mamla, ia u Bah Lessly Shylla bad ia ka MTDC.
Ka jingiasoi ia ka soskular hapdeng ka MTDC bad u Bah Lessly Shylla ban aiwai ia kane ka Hotel kaba don ha Khyndailad ka long ha u snem 2008, bad ha kane ka jingiatehkular ka long ba u dei ban pyndep ia kane ka jingtrei hapoh ka shisnem, hynrei na ki daw kiba ym lah ban kiar ka MTDC kala ai por shuh ia u ban pyndep ia kane ka kam hynrei ym shym la lah ban pyndep ia ka jingtrei bad kane kala pynlong ia ka MTDC ban thung ia u Arbitrator.
Ka jingaiwai ia kane ka Crowbrough Hotel da ka MTDC sha u Bah Lesly Shylla ka long na ka bynta 33 snem bad ha kine ki snem u Bah Shylla u dei ban siew sha ka MTDC T.99.89 klur tyngka bad na katei ka pisa u Bah Shylla u la siew sha ka MTDC kumba shiphew klur ei ei, hynrei ka jingtrei pat ka sah ha juh.
Ki thymmei khubor kiba u SP News Agency u la ioh la ong ba u Arbitrtor u la khot ia kine ki ar liang mamla sha ka jingbishar la ar sien, kaba nyngkong ka long ha ka 18th Nohprah 2016, kaba ar ka long ha u Kyllalyngjot 2017 bad la buh ba un khot biang ia ka jingbishar ha u bnai Lber ban wan.
Lah ban kdew ba ia kane ka Crowbrough Hotel ha Khyndailad la aiti ban shna nyngkong sha ka M/s AC Builder ha u snem 1986, ha kaba kane ka company kala hap ban ai da ka mukotduma ban pynbeit ia ka jingkynrumkynram, bad la ia pynbeit ia kane ka jingeh sha bar jong ka iing bishar ha kaba ka sorkar kala hap ban siew ia kane ka company haduh T.1.2 klur ban ioh biang ia kane ka iing.
Ha dien ba la ia pynbeit bad ka M/s AC Builder ka sorkar kala ai ia ka kam kontrak sha ka M/s Astra Construction, hynrei bad kane ka company ruh kala mih ka juh ka jingeh ha kaba la hap ban pynbeit ia ki kynrum kynram sha bar jong ka iing bishar ha kaba ka sorkar kala hap ban siew ia kane ka company T.1.2 klur ban ioh biang ia kane ka iing bad mynta ka kynti ruh kane ka Crowbrough Hotel kala poi biang ha ka kynrum kynram ha kaba ka MTDC kala hap ban thung ia u Arbitrator ban ia pynbeit ia ka jingeh hapdeng u Bah Lesly Shylla bad ka MTDC.
