Shillong, Naiwieng 23: Ka Ri Khasi ka long shisha ka ri shong pdeng pyrthei ha kaba ka khun Syiem jong ka Ri Thailand mynta ka sngi kala wan iiuh kjat sha kane ka jylla Meghalaya khamtam eh ban leit jngohkai ia ki shong ha ki lum khasi.
Kane ka khun syiem mar iapoi sha Meghalaya mynta ka sngi ka leit sha Mawphlang ban leit jngoh ia ka Lawkyntang kaba don ha katei ka jaka bad kane ka long ka jaka kaba la pynsah nam ym tang ba ka dei ka lawkyntang hynrei ka long ka khlaw kaba khuid bad kaba kyntang ha kaba ym bit ban leh ia ki kam jakhlia ha kane ka jaka bad kane kala rah nam ia kane ka Lawkyntang hapoh ka Hima Mawphlang.
Kane ka khun syiem kala ia kynduh ia u myntri rangbah ka jylla u Dr Mukul Sangma bad kala don ka jingpdiang sngewbha ia ka nama liang jong ka sorkar jylla namar ia ka la pdiang kum ka “State Quest”. Kane ka khun syiem jong ka Ri Thailand kan long sha Sohra bad kan sah miet ha kane ka jaka ba paw nam u slap ba jur tam ha sla pyrthei.
Katkum ka jingthmu jong kane ka khun syiem la ong ba kan leit ban jngoh ia ka shnong Mawlynnong, ka shnong Pdeng kaba don ha neng Dawki bad kan leit ruh sha ka shnong Pongtung bad Nohwet sha lynti ban poi sha Mawlyngong.
Kaneka khun syiem kan leit jngoh ruh ia ka skulbah NEHU bad kan ia kynduh iaki bor ba dei peit ia kane ka skul badh bad ha dien kata kan sa leit sha jylla Assam. Ha kane ka jingwan jong ka la pdiang burom ia ka da ka riam ka khor khasi tynrai bad la pyni ha ka ruh ia ka shad tynrai jong ki khasi bad Jiantia. Ka jingwan jong ka sha India ka long ban wan pdiang ia ka khusnam ia kaba la tip kumka “World Sanskrit Award” ha kaba la khot sngewbha da ka Indian Council of Cultural Relations (ICCR).
