Shillong, jylliew 10: Kumba long lem kiwei pat ki kynhun ne riewshimet ba sngewkhia iaka Mei Mariang, ka Meghalaya Progressive Foundation(MPF) ha ryngkat ka jing ia treilang bad ka Divisional Soil & Water Conservation Dept, Sohra, Sub- Division Of School & Education Officer, Sohra, & Meghalaya State Legal Service Authority, Shillong. Ha ka 5 tarik u Jylliew 2014,ka la pynlong ia ka ‘Environmental Awareness Program’ ha St.John Bosco Hall,Sohra, ha kaba palat 10 tylli ki skul ki la wan ban ia shim bynta kynthup ruh ia kiwei pat ki Riew pawkhmat bad ki nongialam seng bhalang kiba don hapoh jong ka Sohra Civil Sub- Division.
Ha ka phaistep jong katei ka sngi, la sakhi iaka jingiakob dro dur bad iakob thoh ‘slogan’ hapdeng ki samla pule ka thain Sohra. Ki sap ki khynnah pule bad ki khubor jongki, ki la pyn peitmat bad pyn pyrkhat i’u nongsakhi iaki sap kyrpang jongki. Ha ka phaimiet pat la ioh ia ka ‘Environmental Awareness Program’ ha kaba la ioh iaka jingkren shongnia bad kit jingmut na I Bah H.S.Kharpran, Divisional Soil & Water Conservation Officer, I Bah V. Nianglang, Sub Divisional Officer of School & Education Officer, Sohra bad I Bah K.J.Lyngdoh ,OSD Meghalaya State Legal Services Authority.
U Bah H.S.Kharpran i la kren bad pynshai sha ki nongsngap, shaphang ki lad kamai ja ki ban ym ktah ia ka Mei mariang. I la kdewlad ruh iaki lad jingiarap kiba ka sorkar ka don na ka bynta ki nong shong shnong kiba don jingmut ban kyntiew ia ka ioh ka kot ka bym ktah ia ka Mariang bad ki jingthaw jong ka. I Bah V. Nianglang pat i la kren shaphang ka jing donkam jong ki samla pule ban ia treilang bad ban long ki nongmuna ban pynneh pynsah ia ka Mei Mariang,u Bah K.J.Lyngdoh, i la kdew sha ka Artikil 51 ‘A’ -g jong ka riti synshar ka India, kaba pyni shai iaki kamram ba ki nongshongshnong ki don ban leh na ka bynta ka bha ka bit jong ka mariang sawdong.
U la pynkynmaw ruh ba u paidbah um don tang ki ‘hok’, hynrei u don ruh ki ‘kamram’ kum u nongshongshnong ba kit ia ka khia ka shon jongka ri bad ka jaitbynriew.
La pyniaid iaka prokram da u Bah Robertjune K.Jahrin, President Governing Body ka MPF, la ioh iaka jingkren pdiang na U Samla Kitboklang Nongphlang, Administrative Director ka Foundation. La ioh ruh ban pyllait iaka ‘Sohra Declaration’ da u Kongsan Shri. Noor Ain Khan,Member Secretary, Meghalaya State Legal Services Authority.
La ioh ban ai ksai shaphang ka jingthmu ka tnat pynneh mariang ka MPF da U Bah E. Warjri, Environmenta Secy, U ba la kren maitphang shaphang ka ‘Sohra Declaration’, ha kaba la kdewphang iaki thong ba ka MPF ka buh bad ki lad lynti bad rukom kiba ka thmu ban pynurlong ia kita ki jingangnud,na ka bynta ka bit ka pahuh jong u bynriew, ka mariang bad baroh ki jingthaw jong ka ha ryngkew, ha um bad ha suin. Kawei naki matpdeng jongka ‘Sohra Declaration’, kadei ka ‘wad khaw khlem pynjulor mariang’ (Livelihood security sans environmental destruction).
La ban ruh lyngba ka ‘declaration’ shaphang ka jingdonkam iaka roi ka par ka ban pynthikna ba ki longdien wandien, kin pahuh bam pahuh sa bad pahuh um pahuh lyer (Sustainable Development). U Shri. Noor Ain Khan,Member Secretary, Meghalaya State Legal Services Authority haba kren kum u kongsan ha katei ka sngi, u la pynkynmaw bad pynkyndit,ba ka ‘Sngi pynneh Mariang’ kam dei satia ka ‘jinglehkmen’ hynrei ka long u ‘dak jingkyndit’ ba pynkynmaw ia u bynriew ba un hap khie thiah hashwa ba ka rhah jong u kan pynwai bad pynjot thiaw iaka nongaikhaw jong u,ka mei mariang. Ka long ka sngi ha kaba u bynriew un hap phaidien bad bishar iaka lait ka let ka mynnor bad mynta, bad ba un iaid, im bad leh husiar ha ka mynta,khnang ba kan synshar ka pahuh khaw bad riewspah mariang ia ka lawei ki longdien.
La pynphuh pynphieng ia kane ka sngi sah kynmaw da ka rwai ka siaw na ka kynhun ‘Sur Nylla’ bad kumjuh na ki kynhun rwai jong ki skul ba iashimbynta. La pynwai iaka sngi da ka kren aikhublei da I Bah Ksanboklang Kharshiing,Co-ordinator ka Shella-Bhologanj Block ka MPF.(SP News)
