Shillong, Naitung 04: U Lat ka jylla u V Shanmuganathan, mynta ka sngi u la leit ban jngoh ia ki shipai BSF kiba don ha Out Post Shella. Ia u Lat ka jylla la synran lang da u P K Dubey, Inspector General, BSF, Meghalaya Frontier, kane ka jingleit jngoh ka long ban ai mynsiem ia ki shipai kiba don ha khappud ban iada ia ka Ri.
Ha ka jingkren jong u Lat ka jylla sha ki shipai BSF u la ai ka jingiaraoh ka jingshlur kajong ki bad ka jingaiti mon lade ban shakri ia ka Ri khlem da khien ia ki jingeh kiba ki ia kynduh namar kila wan na ki jaka bapher bapher jong ka Ri India ban shong ha ki jaka kiba eh kum ha ki jaka khlaw ha kaba ka sah ka dem kam biang hynrei kila aiti ia lade na ka bynta ban ai jingiada ia la ka Ri.
Ha kane ka sngi la pyniruh sha u Lat jong ka jylla Meghalaya ia ki tiar ialeh jongki shipai BSF kiba don ha khappud bad kane ka jingleit jong u Lat ka long kaba don kam ha dien ka jingiasiat ha Bangladesh ha ka nongbah Dhaka ha kaba 20 ngut ki briew kila duh ei ia la ka jong ka jingi, dei na kane ka jingjia ha kaba la bthah ia ki bor shipai ba kin kham pyrkhing shuh shuh ia ka jingai pahara ha ki khappud bad ka Bangladesh.
U Lat ka jylla u ong ba ki BSF ki long ki nongdang nongker kiba nongkyong ia ka Ri bad ki long ka kynhun kaba bun paid tam ha ka pyrthei ha kaba ai jingiada ia u pud u sam jong ka Ri, u la ong ba u don ka jingshaniah kaba skhem ha ka kynhun shipai BSF ba kin ia trei da ka mynsiem ban ieit ia la ka jong ka Ri ban iada iala ka Ri.
