Shillong, Iaiong 26: U Chief Executive Member (CEM) jong ka Khasi Hills Autonomous District Council (KHADC) u la pynthikna ba mynta ka sngi u la weng noh ia u wei u Executive Member ka na ka Executive Committee u ba dei na ka People Democratic Alliance (PDA) bad un thung bujli noh ar ngut ki EM thymmai, u wei na ka party UDP bad u wei na ka HSPDP nan pyndap ia ki shuki ba thylli.
Haba kren ha ki nongthoh khubor mynta ka sngi ha kamra trei kam ka jong u ha KHADC, u la iathuh ba ha dien ba u Bah Banteidor Lyngdoh u la long u myntri sorkar u hiar shuki noh na ka kam EM bad mynta ka sngi u la weng noh u wei u EM, ia kaba u la kyntiat ban iathuh kyrteng mano uta ba shah weng, hynrei u la pynthikna ba ar tylli ki shuki EM kila lait mynta hapoh jong ka KHADC.
La ong ba ia kine ki ar tylli ki shuki EM kiba lait, un pynrung u wei na ka party UDP bad wei na ka party HSPDP kiba ia don lang mynta ha ka PDA. U Bah Pynshngianglang Syiem u la iathuh ba ha ka iing dorbar kaba 29 ngut ka PDA mynta kala don 24 ngut ki MDC hapoh kane ka kynhun.
U CEM jong ka KHADC u la ong ba ia ka kyrteng jong u EM ba la weng noh na ka EC bad ia ka kyrteng jong ki EM kiba la pynrung thymmai ruh la phah mynta ka sngi sha ka DCA ban ioh ia ka jingmynjur jong u Lat ka jylla ha kaba ia dei bad kane ka jingweng bad thung EM thymmai.
