Shillong Rymphang 01: Ki pulit jong ka East Khasi Hills District mynta ka sngi kila ai khusnam ia ki riew paidbah kiba la iarap ia ki ban kem ia ki nongleh kam sniew, ia kane ka jingpynkup burom la leh da u heh pulit jong ka District u Bah M Kharkrang.
Kiba la shah pynkup burom ki long u Bah Gerry Warjri na sawmer shiteng, une u samla u la lah ban pynioh ia ka number jong ka trok kaba la iuh ia ki ar ngut ki briew kiba shong ha ka bike kaba la jia ha ka 10 tarik jong u bnai kyllalyngkot ha upper Shillong.
U Bah Warjri haba u la iohi ia kane ka jingjia bad ka trok dumper kala phet u la beh na dien jong kane ka trok bad thoh ia u number jong kane ka kali bad mar kumta u la pyntip mar mar sha ki bor pulit bad da kane ka jingiarap ka jong une u rangbah ki pulit kila ioh ban kem ia kane ka trok kaba la phet krad.
Ha kane ka jingjia ar ngut ki briew kila duh ei iala ka jong ka jingim na ka daw jong ka jingiuh jong katei ka trok dumper, kiba la khlad ki long u Bah Donborlang Shynrit 32 bad u Bah Joshua Kurbah ia kane ka bike la niah da u Bah Benedict Mylliemumlong.
Kiwei kiba la shah pynkup burom ha kane ka sngi ki long ka samla Baiahunlang Khyriem bad u bah Wanbhabok Myrthong, kine ki ar ngut kila ialam ia ki pulit sha sha Umran Diary ban pyni ia ka iing ba ka nongrah bor ia ki khublung ba dang lai bnai na Marbisu.
Ha ka 7 tarik jong u bnai kyllalyngjot ka kong Saralinda Kharphuli kala rah bor ia ka khun jong ka kong Shibari Khyriem na Marbisu bad mar ia ioh ia kane ka jingtip ka shnong kala pynlong ia ka jingwad shnong bad ha dien la pyntip sha ki pulit.
Dei ka samla Baiahunlang Khyriem bad u bah Wanbhabok Myrthong kiba la ialam ia ki pulit sha Umran Dairy ha kaba la lah ban ioh ban pynlait ia I khunlung bad dang lai bnai na katei ka nongrah bor.
Kum ka jingburom ia kine ki riew paidbah kiba la wan sha khmat ban iarap ia ki pulit ban ioh kem ia ki riew runar ki pulit mynta ka sngi kila pynlong ia ka jingpynkup burom ia ki da kaba ai ia ka certificate “ Appreciation” ia kane la ai da u SP u Bah M Kharkrang.
