Shillong, Risaw 26: Ka Church 
of God Secondary School, Thangsning ka la pynhap pyrda noh ia ka Annual School Week da kaba plie ruh ia ka Additional Classroom. Ha kaba la plie ruh ia ka kamra iing skul da u Bah Banteidor Lyngdoh MDC.
Ha kane ka sngi la ia don lang u Bah Banteidor Lyngdoh, MDC ka Mawryngkneng bad i kurim jong u i Kong A. Pakyntein, i Kong R.M Pariat District School Education Officer (DSEO) na ka RMSA, u Bah K Rani BMC Mawkynrew Block, i Kong Wesley Pohtam na kaWorld Vision, Thangsning Cluster nalor ki dkhot jong ka Managing Committee ki kmie ki kpa.
U Bah Banteidor haba kren kum u Kongsan u la pynpaw ka jingsngewmen ban iohi ba kane ka skul ka la nang roi bad nang kiew ha kane ka Constituency bad ha ka Block baroh kawei ban pynnang pynstad ia ki khynnah ha kane ka thain. U la ai khublei kyrpang ia ki kmie ki kpa bad ia ki nonghikai kiba la trei shitom bad ia ki khynnah skul.
U ong ba ki nonghikai ki long ki kmie ki kpa kiba ar bad dei lyngba jong ki ba ki khynnah skul ki ioh jinghikai ha ka akor bad ka burom bad kiba saindur ia ka lawei jong ki. Kum u Nongmihkhmat ka thain ula kyntu ia ka Sorkar Jylla lyngba ka tnat Pule Puthi ba kan leh eiei kaba bha tam ia kane ka skul kaba la nang kiew ha ka jingshakri ha ka thoh ka pule ha kane ka thain.
Ka Kong R. M Pariat haba kren kum ka Symbud Kongsan i la iaroh shikatdei eh ia ka skul kaba la nang iai kiew shaphrang ha baroh ki liang. I la pynpaw ruh ia ka jingsngewkmen ban iohi ia ka jinglong ryntih jong ki khynnah skul bad ki sap ba ki la sei kyrpang ha kane ka sngi.
Shwa ban pynkut i la banjur ia ki nonghikai ba kin long kiba trei shitom bad ban long kiba pyntbit (Trained Teacher) khnang ba ka skul kan nang iai kiew ban ia kaba long mynta. I la kular ruh ban leh eiei ia ka skul ha la i bor barit ryngkat ki kyndon jong ka tnat Pule Puthi kumba kane ka skul ju ioh beit 80% ha ka result SSLC ha kine ki snem baroh ba ka ju phah ia ki khynnah.
Ia kane ka kamra klas la shna da ka jingmang pisa une u MDC na ka Special Grant Assistant kaba T. 3 lak. Ki nongkren ha kane ka sngi ki kynthup ia u Bah K. Rani Block Mission Coordinator Mawkynrew Block bad kiwei kiwei.
