Shillong, Rymphang 23: U Direictor jong ka tnad “Arts and Culture” jong ka sorkar Meghalaya u bah Wilfred Nongsiej mynta ka sngi u la pynlait paidbah ia ka kot kaba la ai kyrteng “ La don kam ban pynbeit noh ia ka jingspel dak ia ka ktien Khasi” kaba la pynmih da ka SP News Agency ha Shillong Press Club.
Ha ka jingkren jong u “Director Art and Culture” u bah Nongsiej kum u kongsan u la ong ba la don kam ban rakhe ia ka sngi burom jong ka ktien tynrai la jong bad kane ka kot ka kren kumno ban pynkhlain ia ka ktien ha ka liang ka thoh ka tar. U la ong ruh ba kane ka kot ka long kum ka jingmatphang ia kane ka bynta ka kongsan tam ha kaba ia dei bad ka ktien khasi.
Ha ka jingkren jong u president ka Khasi Author Society (KAS) u Dr DRL Nonglait, u la ong ba haduh mynta kam pat don kata ka kynhun pyrkhat ha kaba ia dei bad ka ktien khasi, kaei kaba la iathuh ka long katkum ka jingsngewbit jong ki nognthoh, kane ka kot kaba la pynmih da ka SP News Agency ka long shisha kaba don kam namar kane kala kdew ia ka bynta kaba kongsan.
U la ong ruh ba ha ka jingshisha ka sorkar kala ithuh ia ka KAS kum ka seng kaba la h ban pynbiang ha kaba ia dei bad ka ktien hynrei haduh mynta ka dang shu don tang ka jingithuh na ka sorkar katba iaki Rule pat haduh mynta kam pat shna, la ong ba kane ka kot kaba la pynmih na ka SP News Agency kala wan ha ka por kaba biang eh haba ka jingialeh ban pynkhain ia ka ktien kala dang iaid sha phrang.
Ha kane ka sngi la ioh ruh ia ka jingkren na u Editor jong ka SP News Agency u bah Starfing JL Pdahkasiej uba la batai ia ka jingthmu jong kane ka kot, ha kaba u la ong ba ka por kala dei ban pynbeit noh ia ka jingspel dak khang ba kiba pule ha ki skul, college bad University kin nym don ka jingbakla.
Ia ka jingialang la pyniaid da u Babu Kular Khongjirem bad ia ka jingkren ai khublei la ai da u President jong ka Shillong Press Club u Bah David Laitphlang, ha kane ka sngi la don lang ruh ki dkhot jong ka seng KSU bad kiba ha iing ha sem jong u Editor ka SP News Agency.
