Jowai, Jymmang, 04: Ka AJYWO Central Body ha u kyrwoh khubor ba la pyllait da u Bah M H Dkhar, President jong ka seng, ka pynrem jur ia ki briew kiba la kylla mrad khlaw ia lade bad leh ia ki kam mrad khlaw da kaba leh be-ijot ia ki kynthei khynnah bad wat ia ki hep rit bapli ruh ki bym pat tip ia ka bneng ka khyndew.
“Ka AJYWO ka pynrem jur haduh katta katta ia u Tyrkeh Sumber na ka shnong Sanaro, kat kum ba la paw ha ki lad pathai khubor, u ba la shah kynnoh leh be-ijot ia iwei I hep rit ba dang 8 snem ka rta, I ba na West Jaintia Hills District ha ka 30 tarik u Iaiong, mynta u snem.
“Ka jingnang iai jyllei jong kine ki kam mrad khlaw pyrshah ia ka long rynieng bad jingim jong kiba lui lui bapli, ka la pynlong ia ki long iing long sem jong ngi bad ruh khamtam eh ia ki khynthei-khynnah bad ki hep rit bapli ban ym don shuh ka jingsngewshngain ia lade la ha kano kano ka jaka ruh,” ong u Bah M H Dkhar President jong ka AJYWO Central Body.
U Bah Dkhar u la bynrap shuh shuh da ka ba ong ba, Ka AJYWO ka pynpaw ia ka jingsngewkhia kaba jur haduh katta katta, halor ka jingbym shngaiñ shuh ki kynthei-khynnah bad ki hep rit ha Ri Jaiñtia, ha ka jylla bad ha ka ri hi baroh kawei namar jong ka jingdon ki briew kiba la kylla mrad khlaw ia lade bad buh ia ka long-rynieng bad ka ka jingim jong ki ha ka jingma kaba khraw”.
“Ngi kyntu jur ruh ia ki pulit bad ki ki Iingbishar ba Don Burom hapoh jong ka jylla kiba dei peit bad tian bishar ia baroh kine ki kam beaiñ ba shyrkhei ban trei shitom da kaba tyngeh ban tem ia kane ka jingshyrkhei kaba la ktah mationg ia ki kynthei, ki khynnah rit, ia imlang ka sahlang bad ka Jaibynriew da kaba kem mardor ia baroh kito ki mrad khlaw bad ruh ban pynsted ia ka jingtian bishar ia kiba kum ki kim kine ki jait mukotduma bad ruh ban pynshitom da kaba tyngeh ia baroh kito ki mrad khlaw ba lah leh ia kane ka kam mrad khlaw.” ong u Bah M H Dkhar.
“Ka AJYWO ka ai ka jingiaroh ia ka Iingbishar Ba Don Burom Ba Ha Khliehduh jong ka Ri India kaba la ai ia ka hukum sha baroh ki Iingbishar hapoh jong ka Ri ban pynsted ia ka ka jingtian bishar ia ki kam mrad khlaw kiba hap hapoh ka jingkdup jong ka, Protection of Children from Sexual Offences (POCSO) Act 2012.
Ka seng khmih lynti ruh ba ki Ingbishar Ba Don Burom ba pher ba pher ha ka jylla, kin pyntrei ia kane ka hukum jong ka Iingbishar Ba Don Burom jong ka Ri India na ka bynta ban pynioh ia ka hok jong kito baroh kiba la ia kynduh ia kaba kum kane ka apot bad ruh khnang ba kan long kum ka jingsneng bad jingtehlakam ia ki ba kum kine ki jaid kam mradkhlaw ban nang kharoi ha ka imlang ka sahlang nangne sha khmat, lym kumta, ki khynthei khynnah rit ba pli ki la don ha ka jingma kaba khraw ha kine ki sngi ba mynta.” ong biang u Bah M H Dkhar.
