Shillong, Jylliew 14: Ka sorkar Meghalaya kala kloi ban pynshai halor ka jingkynnoh jongh ka seng National People’s Party (NPP) ba ka don ka jingiabam sap ha kaba ia dei bad ka jingthied ia u shini ban sam sha ki paidbah lyngba ki dukan rashon ha ka jylla.
Ha kane ka jingpynshai jong ka sorkar ia kaba la phah da u principal secretary food civil supplies bad consumer affair Bah PW Ingty, ka ong ba ia kaei kaba la kren da u nongialam jong ka seng NPP sha ki lad pathai khubor ba ka don ka jingbamsap ha ka rukom thied shini da kaba ai kontrak haka dor kaba heh kaba la palat ia ka dor iew.
Na ka liang jong ka sorkar ka pynshai ba ia u shini la sam sha ki paidbah lyngba ki dukan rashon da u ba la song bha shi kilo ha ki plastik da kaba buh lang ia ka muhor jong ka sorkar jylla bad la sam sha ki paidbah ha ka dor T.20/- tyngka shi kilo kaba long duna ban ia ka dor iew.
Halor ka jingthied ia u shini na iew la khot da ka e-tender bad ha dien ba la dep khot tender ia ka kontrak la ai sha u ba duna dor eh u ba la pynbiang ruh ia ki kyndon baroh kumba la buh da ka sorkar la pynshai u Bah PW Ingty principal secretary food civil supplies bad consumer affair jong ka sorkar Meghalaya.
