Shillong, Naiwieng 07: Ka KHNAM State Youth Wing ka pynrem jur ia ka jingthmu jong ka sorkar BJP ban rakhie ia ka National Good Governance Day ha 25 tarik u Nohprah. Ha u snem ba la leit ruh ka sorkar BJP kala pynbna ia kane ka tarik kum ka Good Governance Day ha kaba la bthah ia ki ophis ban plie baroh shi sngi.
Kane kala pynpaw shai kdar ia ka nongrim jong ka seng BJP da kaba uih roit bad pyntien pynsyier ia ki niam rit paid jong ka Ri India. Kane ka pynshai ruh ia ka jingiadei ba jan jong ka BJP bad ka kynhun shit niam ka Rashtriya Swayamsevak Sangh (RSS).
Balei ym lah ban buh good governance day ha ka sngi Holi lane sngi leh niam puja, balei ha ka sngi kristmas hi thik. Naduh ba wan ka jingsynshar jong ka BJP la iohi ia ka jingshah thombor jong ki iing mane, ki nongialam kristan na kapor sha kapor, bad ngim pat iohi ia ka jingshim khia jong ka BJP ban iada ia ki niam rit paid.
Ha ka kalender ba baroh shisnem jong u 2016 ba la pynmih da ka CBSE la iohi ba la pyntip ba ka 25 tarik u Dec kan dei ka Good Governance Day, kane ka jingthmu ban buh ia ki programme lane ban phah plie skul bad college bad ophis trei kam ha kane ka tarik ka dawa ka jingpynrem ka ba jur na baroh ki liang.
Kane ka kdew ba ka BJP ka iaid ia ka lynti ban pynduh noh bad ban nion beit naphang ia ka niam kristan khlem da burom shuh wat ia ka sngi ba khraw tam jong ki kristan. Kane kadei ruh ka jing pynkhien im im peit peit jong ka BJP hapoh ka jingiam jong u Narendra modi ia ka riti synshar ka ri India kaba la ai bor ia baroh ki niam ban rakhie ia ki sngi khraw jong ki kat kum ka jing ngeit jong ki.
Ka seng ka pynrem jur bad ka kyrpad ia baroh ki skul ki college ki ophis ban pyrshah da kawei ka sur ia kane ka rai jong ka sorkar BJP. Ka jingsngap jar jong ki ba bun bad ka Sorkar jylla naduh u snem ba la dep kala ai bor ia ka BJP ban dang bteng ba uih roit.
Ka seng ka dawa ba ka sorkar jylla bad ki nongmih khmat baroh bad pynrem da kawei ka sur da kaba pynbna lymba ki lad pathai khubor ba ka jylla kan dang iai bteng ban burom ia ka jingrakhie ia ka sngi kristmas da kaba pynbna shuti kumba juh long. Lada ka Sorkar Pdeng ka iaid shakhmat halor kane, ka seng kam ban se ban pyrkhat da kumwei rangkat ki paidbah ka thain, ong ka KHNAM.
