Shillong, Jymmang 02: U myntri rangbah ka jylla u Dr Mukul Sangma u la iathuh ba ka cabinet mynta ka sngi kala shim ia ka rai ban pynkiew da 100 percent ia ka tulop jong ki nonghikai, jong baroh ki skul kiba la ai jingiarap da ka sorkar, kane ka rai ban pynkiew tulop ia ki nonghikai ka kynthup ruh ia ki nonghikai Hindi, ki 4th Teacher kiba hikai ha ki SSA skul.
U myntri rangbah u la ong ba kane ka jingslem ban pynkiew ia ka tulop ka long ba kala don ka jingdawa ba ka sorkar ka dei ban shimtio noh ia ki skul, Hynrei na ka liang jong ka sorkar kala kren shai ba da lei lei kan nym shimti ia ki skul hynrei kan iarap ia ki managing committee da kaba pynkiew ia ka jingiarap pisa da 100 percent na kaba ki juh ioh.
U myntri rangbah u la pynshai ba lada ki nonghikai kiba juh ioh ia ka tulop shipah tyngka mynta kin ioh noh arspah tyngka kaba mut ka jingpynkiew ia ka tulop jong ki nonghikai ka long 100 percent. Kane ka jingpynkiew tulop kan long naduh ka 1st Kyllalyengkot 2017. Da kane ka jingpynkiew tulop ka sorkar ka hap ban sei tam ia ka pisa da T. 63.12 klur tyngka.
Kiwei ki rai kiba ka cabinet kala shim mynta ka long ki long, ban pynioh bor ding eletrik sha ki nongkyndong baroh yn pynshlur da kaba pyntrei kam ia ka Solar light, ha kaba ka sorkar pdeng ka Rural Electrification Corporation (REC) jong ka sorkar pdeng bad ka Meghalaya Renewable Agency kin sa ia soi ia ka jingiateh kular ban pyntrei kam ia kane.
Ha kane ka jingialang ka cabinet kala rai ruh ban pynhiar ia ka dor jong ki cigarrate , Biri na ka 27% sha ka 25% . Haba ia dei bad ka jingdie khutia ia ka kyiad phareng ha ki dukan ka cabinet kala shim ia ka rai ban pynkiew noh ia ka jingiohnong jong ki dukan kyiad na ka 10% kaba juh long baroh shikatta sha ka 20%. La leh ia kane da kaba pynkylla ia ka Meghalaya Excise Rule kaba 372.
