Shillong, Kyllalyngkot 15: Namar ka jingsngap jar bad leh mynthi bad leh bym suidniew jong ki bor pyniaid ka NIOS ban pynbeit ia ka result jong ki 4385 ngut ki nonghikai kiba ialeh ia ka exams ban pyntbit ha ka kam hikai, ka Diploma in Elementary Education (D.El.Ed) batch 2013 kiba kynthup ia ki nonghikai SSA, Govt, Ad hoc bad Deficit kiba hikai ha ka elementary level, ka Meghalaya SSA School Association (MSSASA) Central Body ka la rai ban pynlong da ka jingshong kyllain mungor ha khmat jingkhang ka ophis treikam ka NIOS Shillong (Gate Dharna) kaba don ha Laitumkhrah ha ophis jong ka Directorate of Educational Research & Training (DERT) Shillong ha ka 24 bad 25 tarik mynta u bnai.
U bah Aristotle C. Rymbai President ka MSSASA Central Body haba ha ka kyrwoh kaba la phah sha ki lait pathai khubor , la ong ba ia kane ka rai la shim ha ka CEC jong ka MSSASA kaba la long ha ka 12 tarik mynta u bnai.
“Lada ki bor pyniaid ka NIOS kim lah ban pynurlong ia ki jingdawa kiba kynthup ban pynbeit ia ki kynrum kynram (anomalies) ha ka result , ban ai da ka jingthoh halor ban pynjlan (extend) ia ka validity period jong ka D.El.Ed course bad ki tarik ban pyndap ia ki form ban ialeh biang ia ka exams jong ki subject ba shah bat (failed) hapoh shitaiew kata ha lane shwa ka 23 tarik mynta u bnai , ka synjuk kan iaid shakhmat ia ka jingshong kyllain mungor ha ka 24 bad 25 tarik mynta u bnai ka ban sdang naduh ka por 11 : 30 mynstep haduh 2 baje janmeit” ong u bah A.C. Rymbai.
Haba pynpaw ia kajuh ka sur, u bah H.M.Marbaniang General Secretary ka MSSASA Central Body u ong kane ka jingleh thurmur jong ka NIOS ka la ktah shikatdei eh ia ki 4385 ngut ki nonghikai kiba la bei pisa da ka Sorkar Jylla ban phah leit pyntbit ha ka kam hikai lyngba ka D.El.Ed kaba ka Sorkar Jylla ka iateh bad ka NIOS khamtam ia ki nonghikai SSA kane ka jingpynslem ka NIOS ban pynbeit ia ka result kala pynduh ia ka hok jong ki ban ioh jingmyntoi na ka jingpynkiew tulop thymmai jong ka Sorkar Jylla.
“Leh bakla ka NIOS , shah ktah bad hap siew dor ki nonghikai” shano ka hok ki nonghikai kiba ngi khot ki nongsaindur ia ki khun ki kti jong ngi bad ka ri hi baroh kawei, buh jingkylli ka MSSASA.
La ong ba ki la dep ia kynduh ruh ia u Dr Chandra Bhushan Sharma Chairman ka NIOS ha ka 13 tarik Nohprah , 2016 ha headquater ka NIOS ha Noida , ia kaba u la kular ban pynbeit ia kitei ki jongbakla baroh hynrei haduh mynta ka shu sahkut kumjuh. kane ka long tang ka jingsdang jong ka jingiakhih bad la da ka NIOS kam lah ban pynurlong ia ki jingdawa ngin nang pynbud shuh shuh sa da kiwei ki program jingiakhih ki ba ngin sa pynbna ha ka sngi ba kut ka gate dharna” bynrap shuh shuh u bah H.M. Marbaniang. Ngi kyrpad ia baroh ki trainees naduh ki nonghikai SSA, Govt, Ad hoc bad Deficit ban ia mih paitbah ha ka 24 bad 25 tarik mynta u bnai ban dawa ia la ka hok.
Ban shu pynkynmaw ka NIOS kala pynmih ia ka result jong ka D.El.Ed final year batch 2013 ha ka 9 tarik Nailur , 2016 kaba don shibun ki jingduna bad ki kynrum kynram , kata ruh hadien ka jingpynslem kaba 9 bnai kynthih namar ka tarik ban pynmih ia ka result ka dei naduh16 tarik Nohprah, 2015.
La sakhi ruh ia ki jingiakhih jong ki nonghikai (trainees) ba la ai jingkyrshan da ka synjuk ki nonghikai SSA ka Meghalaya SSA School Association (MSSASA) Central Body ha ka 28 tarik Nailur, 2016 ha Office treikam ka NIOS ban pynshah ia ka jingleh torti ka NIOS.
