Shillong, Jylliew 09: Thrang bad rai ia treilang ban ia tylli lang ki nongialam Riewlum kiba la khot bad tip kum ki Adivasi na Andhra Pradesh, Telengana bad ka Dorbar Grand Council of Chiefs of Meghalaya, Kaba kynthup ia ka Dorbar Ki Khlieh Nongsynshar, Ka Federation of Khasi States, Ka Dorbar Ki Dolloi, bad Council of Nokmas, ban pynsngew ia ki hok jingdawa jong ki hakmat ka Ri India.
Ia katei ka rai la shim ha ka jingialang kaba la long ha ka 7 tarik June 2014, hapoh kawei ka shnong kyndong, kaba jngai antad kumba 1950 km na shillong, bad ka don sha ki bynta lum kumba antad 140 km na Visakhapatnam District, kaba kyrteng Y.Kantivaram, kaba dei ka shnong hapoh ka G.Madugula Mandal, Paderu, Visakhapatnam District, Andhra Pradesh, ha kaba la ia don lang u Shri KP Dora, National Convenor, Adivasi Aikya Veedika,(ka seng jong ki Adivasi ka Ri India), u Shri. S VyekuntaRao, Dist Convenor, Srikakulam District, u K VenkateshwarluDova, Dist Convenor, East Godavari Dist, u Shri. V Rambabu, Shri. Kosuri Sana Raju, Shri. Gonela Venkata Laxmi, Shri.Salapureddy Ammi, baroh na East Godavari Dist, Shri.Padla Tammayya, Dist Convenor, Vizayanakavan, Shri. K Krishna Rao, Convenor, Visakhapatnam Dist, bad u N Madhusudhan, u Director, Secretariat, Adivasi Aikya Veedika, na Hyderabad.
Ha katei ka sngi katei ka seng Adivasi Aikya Veedika, kaba la khot sngewbha ia u Bah John F Kharshiing, Chairman, Co-Chairman, Meghalaya Sate Planning Board(MSPB), Chairman, Grand Council of Chiefs of Meghalaya, Spokesperson, Federation of Khasi States, ban shong sah shi miet ha katei ka shnong kaba dang don bun ki jingduna (kaba ym patdon bording, ym pat ioh ia ka um bam umdih, kaba ym don paikhana) ki la pdiang ia u hapoh shnong katkum ka Riti ka Dustur jong da ka jingtied ksing, bad ha kaba ki longkmieh ki la sait ia ka kjat u Bah John F Kharshiing, hakhmat u khilong ha shwa ban rung shapoh Shnong. La pynlong ia ka jingduwai da u Lyngdoh jong ka Shnong, uba la phah ia u Bah John F Kharshiing ban pynpait shisien tied ia uwei u snepkor, kum ka dak jong ka jingwan ka khubor kaba bha hapoh shnong.
Hadien kane la pynlong ka jingialang jong kitei ki nongialam hakhmat ka jaka leh niam kaba dei shapoh ki khlaw kiba rben ha syndah shnong. Ha katei ka jingiakren la pynlong ki jingiasyllok kumno ba ki riewlum jong ka Ri India ki dei ban tur hapoh kawei ka thong . Ki ruh ki la mynjur ba ka don ka jingeh kaba khraw ia ka jingsynshar tynrai namar ba thombor ka synshar ‘party’, kiba pynkulmar bad tuklar ia ka Riti Dustur bad ka synshar tynrai tang na ka bynta ka jingmyntoi jong ka synshar shimet.
Ki la pynpaw ia ka jingeh kaba khraw halor ka jingshah iuh roit ka hok halor ka khyndew ka shaip, ha kaba ki bor jong ka AIN ki knieh ia ka hok halor ka khyndew ka shiap, namar ba ym don ka jingthoh kaba shai hapoh ka Constitution Ri India.
Ki nongialam jong ki riewlum Adivasi, ki la kyndit ban tip ba ki Syiem, Lyngdoh, Sirdar bad kiwei ki don ia ka dulir ia teh kaba la tip kum ka Instrument of Accession Annexed Agreement, kaba la pdiang, mynjur bad soi da ka Sorkar India ha ka 17 tarik August 1948, bad ki Hima Khasi States, lyngba ka Federation of Khasi States. Ki la pynpaw ba ki la long kiba kloi ban ia snoh kti lang ban ioh ia ki jingpruid dak kiba shai hapoh ka Constitution ka Ri India, halor ka khyndew ka shiap, ki khlaw ki btap bad ki marpoh khyndew.
Ha ka juh ka por ki la kyndit ban tip ba haduh kine ki sngi ki Khlieh Nongsynshar ka jylla Meghalaya, kim don hapoh ki District Council, ia kaba u Bah John F Kharshiing, u la ong ba kumba ka long mynta ki Hima ki shah thom bor bun sien ha ki seng sain pyrthei hapoh ki District Council namar bun ki nongpyniaid CEM ne EM, lane ki nongmihkhmat MDC ha kitei ki District Council kim tip ei ei shaphang ka Riti ka Dustur jong ki Hima/Elaka, bun ki long kiba shu wan mih ruma shapoh ka ADC bad ki pynkulmar ia ki jingsynshar tynrai. U la ong ha ki ba ki bor District Council ha ki 60 snem ki la kylla long tang ki nongpynkiew iing lieh iing saw ia ki Hima/Elaka. Hynrei u la ong ba ha kaba kut ki CEM, ki EM, ki MDC ki wan ki leit hynrei ki Hima/Elaka ki neh haduh kine ki sngi.
Kumta u la ong ba lada ki dawa ban ioh Council u la kyntu jur ia ki ban da pyntikna ba kan long ka Council kaba khlem liang, lane kaba khlem don ki seng sain pyrthei.
Ki la pynpaw ia ka jingangnud ba maki ruh ki da kwah ba ka Sorkar India ka dei ban plie lad da ka Council na ka bynta ki jingsynshar tynrai kiba khlem party khnang ban ioh iada ia ki Hok ki Riti na ki party bad ki seng sain pyrthei (political party) bapher bapher kiba pyrshang ban mushlia tang na ka bynta ka jingmyntoi jong ka party jong ki katto katne ngut.
Na ka liang u Bah John F Kharshiing, Chairman, Co-Chairman, Meghalaya Sate Planning Board(MSPB), Chairman, Grand Council of Chiefs of Meghalaya, Spokesperson, Federation of Khasi States, u la pyntip ia ki ba kham mynshwa u la dep ia pynbeit bad ki riewlum hapoh jylla Tamil Nadu, Karnataka, bad kiwei kiwei ki Jylla, ha kaba la seng ia ka Tribal Council of India, bad u la khot lang ia ki ban ia snoh kti lang ha katei ka kynhun.
Katei ka jingialang ka la rai ban ia kynduh biang hashen ban pynwan dur ia ka jingiatreilang hapdeng ka Grand Council of Chiefs of Meghalaya bad ki Riewlum Adivasi. (SP News)
