Shillong, Naiwieng 01: Ka skul bah North-Eastern Hill University mynta ka sngi kala rakhe ia ka sngi kha ba 141 snem jong u Sardar Vallabhbhai Patel, ha kaba la niew ia kane ka sngi kum ka sngi jong ka jingiatylli jong ka Ri. La rakhe ia kane ka sngi da ka jingpynlong ia ka jingiamareh hapoh jong katei ka skul bah.
Ia kane ka jingia mareh la khaweh lama da u Vice Chancellor, Prof. S.K.Srivastava ha kaba ma u hi u la ia shim bynta ha kane ka jingiamareh bad la sam khusnam ruh sha ki nongjop jong kane ka jingiamareh.
Ha dien jong kane ka jingiamareh la pynlong ruh ia ka jingsngap jar kaba shi minit ban kynmaw burom ia baroh ki riew khraw kiba la aiti ia la ka jong ka jingim na ka bynta ka Ri ban pynneh pynsah ia ka jingsuk jong ka Ri da kaba shim ruh ia ka jingsmai.
Kane ka skul bah kan pynlong ruh ia ka jingiakop dro dur ha ka lai tarik mynta u bnai ban kynmaw burom ia kane u riew khraw jong ka ri u ba la lah ban wan rah ia ka jingiatylli jong ka Ri ha dien ba la ioh ka jinglaitluid.
