Shillong, Lber 10: Ka Synjuk Ki Seng Longkmie Katholik Archdiocese Shillong Jong ka Zone II ha ryngkat ka pyrthei baroh kawei ka la rakhe kyrpang ia ka sngi bakyrpang jong ki kynthei kaba la tip kum ka “International Women Day’s” mynta ka sngi ha Shnat Niam Divine Saviour Nongthymmai.
Ha ka sngi kyrpang jong ki kynthei shi tyllup ka pyrthei na ka liang ka jylla niam bah Shillong lyngba ka Zone II ka la rakhe kyrpang ha kaba u Archbishop Victor Lyngdoh ka Jylla Niam Bah u la long u kongsan ban tyrwa ia ka Mass Bakhuid ha ka jingiasynrop lang u Parish Priest ka Divine Saviour Parish u Sohblei Augustine Kuttala uba dei u Spiritual Director jong ka Synjuk ki Seng Longkmie Katholik Zone II.
U Archbishop Victor Lyngdoh ha ka sneng ka kraw ia ki kynthei ha lympung ba 8 bad jingrakhe ia ka Sngi kyrpang jong ki kynthei ha pyrthei la buh ia ki kyntien mat puson “U Kpa Jong ki u la ai bynta ia ki khun kynthei bad ki hynmen shynrang ia kaba la sot na ka kitab Job 42:15.
U la pynpaw ba kane ka dei ka kam phyla jong U Blei ban pynkhraw ka long ba ki kynthei ki don ka bynta kaba khia tam ban iatynrong ia ka kam ka shon jong ka iing ka sem bad ka imlang ka sahklang.
Ka kynthei ka dei ka Dohnud jong ka iing ka dem bad u kpa u dei Khlieh ka iing, sngewkmen pat ki kynthei ne ki long kmie ki ialong ryngkat lang ym don ba khraw ne barit bynrap u Archbishop.
Ha jingkmen ia ka Sngi kyrpang jong ki kynthei u Archbishop u ai ia ka jingkmen ban ioh ba ki kynthei mynta ki la paw bad kiew shaphrang wat ha ka imlang ka sahlang haba ianujor bad ki shynrang la ha ka kam ka jam ki la kham tbit ki kynthei.
Ki Longkmie ne ki kynthei ki dei ka jingei jong U Blei ba ki long kmie ki dei ban long kiba nyngkong ban iaroh ia u Blei namar ki long ki sim ki doh iaba iaroh ia U blei.
Hadien ka nguh ka dem blei ka la don ka jingialang kaba rit ba la pyniaid da ka synjuk ha ka jingialam ka President jong ka Synjuk I Kong Cathleen Pyngrope bad kumjuh ka jingiakop rwai da ka ktien U Blei.
Ha ka iadon lang ki nongkitkam ka Synjuk seng kmie ki Seng long kmie na ki san tylli ki San tylli ki Shnat niam ka Pynthorumkhrah, Laitumkhrah, Nongthymmai, Nongmynsong bad Mawpat.
