Shillong, Naiwieng 22: U Chief Secretary jong ka jylla u KS Kropha mynta ka sngi u la khot ia ka jingialang ban peit bniah ia ka jingdon ka pisa ha kane ka jylla ha dien ba la pynkylla noh ia ka pisa T.500 bad T.1000 tyngka ka pisa ba rim. Ia kane ka jingialang la pynlong ha ka jingiadon lang u Dr Sumeeth Jerath, Additional Secretary bad u ba dei ruh u Financial Advisor, jong ka tnad kam bar ri jong ka sorkar pdeng ia kaba la phah da ka RBI ba un wan sha kane ka jylla ban peit ia ka jingdon ka pisa ha ki Bank bad ki Post Office.
Ha kane ka jingiakren kaba la long mynta ka sngi ka long ban peit ruh ka jingthep pisa jong ki briew sha ki bank bad ka jingpoi jong ka pisa thymmai. Kumba ka long mynta ka lut arhajar ka don bun ha kane ka jylla, hynrei ka jingeh ka long ba pisa kaba kham rit ka dang duna palat ba kane ka long ka jingeh kaba ka jylla ka ia kynduh mynta.
Na ka liang jong ka RBI kala pyntip b aka lut san spah kaba thymmai kan poi sha kane ka jylla hapoh jong kane ka taiew kaba mynta bad kane kan ia rap ban pynduna ia ka jingeh jong ki paidbah. U Dr Sumeeth Jerath u la iathuh ba u la dep ban ia kren bad u Regional Director, jong ka RBI, Guwahati bad u l dep kular ban ai ki jingiarap baroh kat kaba don kam ia ka jylla.
La iathuh da u Dr Jerath ba na ka liang jong ka tnad pla pisa jong ka sorkar pdeng kala dep ban bthah ia baroh ba ka pisa ka dei ban biang sha ki jylla . U ne u heh jong ka sorkar pdeng yn leit ban jurip da la dei ia ka Ri Bhoi, Nongstoin bad West Jiantia Hills District . La ong ruh ba ia ki ATM kiba don ha ka jylla la pynbeit ha kata ka rukom ba ki lah ban sei ia ka lut arhajar tyngka bad ka ia lut san spah tyngka kaba thymmai.
Ka Postal Department kiba don 68 tylli ki jaka trei kam jong ka bad 348 tylli ki shnat jong ka ruh kin kylliang ia ki pisa bad kane kan kham pynsuk ia ka jingdon kam jong ki paidbah khamtam sha ki nongkyndong.
Ha kane ka jingialang la ia kren biang ruh ia ki pisa nar shiphew tyngka bad u CGM jong ka RBI kaba don ha Shillong la ong ba baroh kiba 10 tyngka nar kiba la don mynta ki long kiba la shna da ka RBI bad ki nong die jingdie ki dei ban pdiang ia ki.
Na ka liang jong u Chief Secretary u la ong ba ka sorkar jylla kala shim ia baroh ki lad ki lynti ban peit ba ka pisa ka dei ban biang ha kane ka jylla khnang ba ki kam ki jam ki khaii pateng kin iaid beit bad ki paidbah kin nym ia kynduh kano kano ka jingeh ha kane ka por ba ka don ka jingkylla ha ka pisa.
