Shillong, Rymphang 22: Ka Dorbar Ki Khlieh Nongsynshar ka Ri Hynniewtrep, Kaba kynthup ia ka Federation of Khasi States, Ka Dorbar Ki Dolloi, Ka Dorbar ki Nokma, ka la ia kynduh mynne ka sngi (21-02-2017), ha Lumbasuk, Demthring, Shillong ban ia tai halor ki AIN kiba mih na ka Sorkar Jylla bad na ka Autonomous District Council (Sixth Scheduled) Ka The Meghalaya Building Byelaws 2011 ka The Khasi Hills Autonomous District (Land Development and Building ) Regulation 2015, Ka The Administration of Nongstoin Syiemship Rules 2006, bad Ka The Administration of Mylliem Syiemship Rules 2015,
Hadien ka jingiatai kaba jan lai kynta, ka Dorbar FKS ka la rai ban kyntu ia baroh ki 54 Hima,19 Elaka bad ki 1400 Nokma, ba kin rah kyrkieh ia kitei ki ar tylli ki AIN Ka The Meghalaya Building Byelaws 2011 (shispah khadwei sla) bad ka The Khasi Hills Autonomous District (Land Development and Building ) Regulation 2015 (shispah sawphew saw sla), hakhmat ki paidbah ha la ki Dorbar Shnong, Raid haduh Dorbar Hima, kum shi bynta ban pynshai sha ki khun ki hajar ia ki jingeh ki jingkitkhlieh kiba lah ban mih na baroh ar tylli ki AIN, kiba bun bah ki kyndon ha ka ktien phareng.
Ha kawei ka liang, na ka liang ki Khlieh Nongsynshar ki la pynpaw ia ka jingeh kaba ap ia ki paidbah ha ki Hima/Elaka namar ha kawei ka liang kitei baroh ki ar tylli ki AIN la thaw da ki Nongmihkhmat MLA bad MDC ha ka ktein phareng khlem da wanrah shuwa hakhmat ki paidbah, bad haduh kine ki sngi baroh ar tylli ki bor Sorkar Jylla lane Sorkar District Council kim shym la phah copy ia kitei ar tylli ki AIN sha ki Syiem, Sirdar, Lyngdoh, Dolloi lane Nokma. La kyrpad ia baroh ki Dorbar Shnong, Dorbar Raid bad Dorbar Hima/Elaka lada ki donkam ban wan shim ia ka copy na ka office jong ka Dorbar ia kitei ar tylli ki AIN kiba long kumba 255 sla ha ka dor (Rs 300) lane ban phah da sms message sha u u mobile 9436102663.
Shuh shuh kitei ki AIN kumba ka paw ki la knieh ia ka bor jong ki Hima/Elaka ban thaw ia la ki bye Law katkum ki Rule kiba la pass hi da ki bor KHADC bad kiba la mynjur da u Lat ka Jylla, khamtam ki Hima kiba la don lupa ki Rule, bad la kyntu jur ia ki Khlieh Nongsynshar ban rah ia kitei ki ar tylli ki AIN hakhmat u paidbah ha la ki Dorbar Shnong, Raid bad khamtam Dorbar Hima, ban ia kren bniah halor katei ka phang, namar kumba ka paw ka Ka The Administration of Nongstoin Syiemship Rules 2006 bad ka The Administration of Mylliem Syiemship Rules 2015 la thoh shai ba Syiem and Dorbar shall issue “building permission” bad kiwei kiwei.Ka Dorbar Federation of Khasi States ka dawa na ka Sorkar bad District Council ban pynmih kyrkieh ia kitei ki AIN ha ka ktien KHASI bad GARO ban shai ki paidbah.
Shuh shuh, ka Dorbar FKS ki la ia tai ruh halor ka jingdon kam ban register haduh LAI sien ia ka juh ka khyndew, ha kaba ki paidbah ki hap ban register LAI sien kaba nyngkong katkum ka 1) Indian Registration Act 1908, Indian Stamp (Meghalaya Amendment) Act, 1993 kaba ar katkum ka 2) Schedule II (villages) Guidelines for all proposed New Land Development /Master Plan of The Khasi Hills Autonomous District (Land Development and Building ) Regulation 2015 (All private and Clan land shall be recorded with the Executive Committee of the KHADC bad kaba lai katkum ka 3) Section 8. B. (i) of The Administration of Mylliem Syiemship Rules 2015 and processes for registration of record of right. Katkum ka jingbatai ka iing bishar High Court badon burom dei tang ka dulir kaba la register ha office Deputy Commissioner kaba long kaba don dor.
Haba kumta kaei ka jingmut ban register haduh lai jaka bad ka jingkylli ka long balei ba ki ain ba thaw ka KHADC ki madan noh hakhmat ka Ain Ri India, namar lada kam lah ban iada ia ka Hok jong ki iit ki Hima ka long kaba shyrkhei bad ka ap ka jingma ia ka lawei jong ka Ri Khasi. Ka Dorbar ka pynpaw ruh ba ha kawei ka liang ka dei namar ba tlot ka Sixth Scheduled la poi sha ka lynti ban dawa ia HILL STATE ynda la ioh HILL STATE ngi sah kut kumjuh ka paw ba kam don ka jingiada kaba kyrpang hapoh ka Constitution Ri India.
Halor katei ka phang ka Dorbar FKS ka la pynpaw ia ka jingbynniaw namar kitei baroh ki la jia namar ka jingbym paw ki kyndon IOA & AA hapoh ka Constitution Ri India.Ka Dorbar Federation of Khasis States ka la rai ban ia kynduh sa shisien ban ia kren buddien ia u Chief Minister bad Chief Executive Member, KHADC ban pan jingshai halor ka jingsngap jar ia ka shithi kaba la wan na ka Union Ministry of Home Affairs naduh u July 2012 bad ha u Nov 2014 kiba la pan ia ka jingshai na ki bor Sorkar Jylla bad Sorkar District council halor ka jingdawa ki Khlieh Nongsynshar ban pyntreikam ia ki kyndon IOA & AA ha kaba la thoh shai ha ka kyndon san (clause 5) jong ka Agreement ba ka bor Sorkar India kam lah ban thaw AIN khlem da mynjur ki Hima/Elaka Federation of Khasi States.
Ha ka juh ka por ka Dorbar Federation of Khasi State ka la ai bor ha u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, bad Spokesperson, Federation of Khasi States, ban pynkhreh da ka Resolution ban phah sha ka dorbar KHADC bad ka Sorkar Jylla ban mynjur hapoh ka Assembly bad District Council Session kum shi bynta ban dawa na ka Sorkar India ban pyntreikam ia ki kyndon baroh jong ka Instrument of Accession bad Annexed Agreement kaba la mynjur bad soi da ka Sorkar India ha ka 17 tarik August 1948, bad lada kitei ki bor kim ai ka jubap kaba shai ka Federation of Khasi States kam banse ban ujor ban dawa bad leit ia kynduh biang ia ka Sorkar India ban kyntu ia ka ba kam dei shuh ban ap ia ka jubap na kitei ki bor namar ka jingsngap jar jong ki ka long namar ba kim dei ki trai jong ka kam bad ka paw ba kim don ei ei ban ong halor kitei ki jingiatei kiban iada ia ka Ri Khasi States.
Ha katei ka Dorbar kiba la ia kren bad kiba la ia don lang ki long u Paiem PM Syiemlieh, Syiem Nongkhlaw, Vice President, FKS, u Bah Harlinjai Skhemlon, Sirdar Hima Mawdon, & Secretary, Federation of Khasi States, u Bah H L Ryntathiang, Lyngdoh Hima Lyngiong, u Bah E Kurbah, Acting Chief Hima Marbisu, ki Rangbah ka Hima Riangsih bad kiwei kiwei ki Nongsynshar.
