Shillong, Rymphang 02: U Bah Banshai Marbaniang u wei na ki nongshong shnong jong ka shnong Mawsynram u la pan ia ka RTI na ka ophis jong u Deputy Commissioner jong ka East Khasi Hills District ban tip halor ki skhim kiba u Bah PN Syiem MLA jong ka Mawsynram Constituency u la pyntrei kam na ka MLA skhim.
Haba kren ha ki nongthoh khubor mynta ka sngi ha Shillong Press Club u la ong ba ha kine ki hynniew snem jong ka jingling MLA jong u Bah PN Syiem u la pyntrei kam ia ka MLA skhim kaba la kot sha ka T.8.17 klur tyngka, na ki hynriew tylli ki skhim ia kiba la tip kum ka MLA skhim.
Kine ki skhim kiba u la lap lyngba ka RTI ki long, ka CMSRDF, ka CRRP, ka ISCDP, ka ISYDP, DTFM bad ka SRWP, ka jingpyntrei kam ia kine ki skhim naduh u snem 2008 haduh 2015, ka pisa baroh kala kot sha ka T.8.17 klur tyngka
Kaba la pynthikna da u Bah Marbaniang ba kam don hapoh jong ka Konstitwensi ka dei ka kali Ambulance kaba la thied ha ka dor T.5.5 lak tyngka. Kane kala paw shai ha ka RTI ba la dep thied ia kane ka kali hynrei kane ka kali kam don hapoh ka Konstitwensi. U bah Banshai u la ong ba leh se kin dang don shuh ki skhim kaba ki paidbah kin tip.
U bah Banshai u la ong bay n sa thoh da ka jingujor sha u myntri rangbah ka jylla bad sha u Chief Secretary jong ka jylla ban phah tohkit halor kine ki skhim kiba la pyntrei da u MLA jong ka Mawsynram Constituency bad lada lap ba ka don ka jingpyndon kam bakla u long u ba la kloi ban ai da ka FIR pyrshah ia u MLA.
