Shillong, Naitung 17: Ka long ka jingkmen bad sarong ia ka jylla bad ka ri hi baroh kawei, ha kaba 5 ngut ki nongialehkai martial arts jong ka Meghalaya Association of Kickboxing Organisation (MAKO) ki la shah jied ryngkat bad katto katne ngut na kiwei ki jylla ka Ri India ban leit ban mihkhmat ia ka ri ha ka lympung ialehkai WAKO Cadets & Junior World Kickboxing Championships 2014 ka ban long naduh 6 haduh 14 tarik Nailur 2014, ha Rimini Italy.
Ka MAKO ka buh ka jingkyrpad sha baroh kiba don ka jingkitkhlieh ha kam pynroi bad pynialehkai bad ieit ia ka kam sport, ki kynhun bapher bapher lane ki riew shimet ban iarap ban pynurlong lem ia ka jinglah kine ki 5 ngut ki nongialehkai kickboxing cadet na Meghalaya ban poi sha katei ka lympung ialehkai ha Italy, namar kan long kaba eh shisha tang da ka MAKO marwei ban leh kat kane ka kam.
Ia kane la rai bad la pynskhem ha Ka Board Meeting Ka National Kickboxing Federation of India (NKFI) kaba dang shu dep long shen ha ka 11-12 tarik ‘Naitung 2014 kaba la long ha Aravali Golf Club, Faridabad, Haryana.
U Bah Donny Ranee, Vice President NKFI u la mih khmat na ka bynta Ka MAKO ha kane ka jingialang. Ka Board Meeting ka la ioh ruh ka lad ban iakren da kumno ban wanrah shibun ki jingmyntoi bad ki kam pynroi ia kane ka jingialehkai martial arts Kickboxing ha ki jylla shatei lam mihngi bad wat ha ka jylla Meghalaya ruh.
Ia kane la pynsngew bad la ioh ban iakren ruh bad U Secretary of Youth Affairs & Sports, Government of India ha Delhi.
Ka NKFI ka la ioh ruh ban iakynduh bad u Satpal Singh, Secretary National School Federation of India uba la mynjur ban pynlong ia ka kickboxing kum kawei ka jingialehkai (regular sports) ba la ithuh da ka sorkar bad National School Federation of India.
Ka MAKO kan sa leit ia shim bynta ruh sha Ka Junior National Kickboxing Championship 2014 (10-12 tarik October 2014) ha Pune Maharashtra bad ha Ka Cadet & Senior National Kickboxing Championship (18-21 tarik Nohprah 2014) ka ban long ha Faridabad, Haryana.(SP News)
