Shillong, Rymphang 22: Ka kong Grace Kharpuri EM ba dei peit ia ka tnad khlaw hapoh jong ka KHADC haba jubab ia ka jingkylli jong u Bah M Nongrem nongialam ka liang pyrshah kala ong ba ka dei ka jingshisha ba kala don ka jingpyndon kam bakla ia ka pisa kaba dei na ka Royalty da u nongap khlaw jong ka KHADC u ba la buh ha Umtham.
Kane ka pisa kaba la pyndon kam bakla da u ne u nongtrei jong ka KHADC kala kot sha ka T.43 lak tyngka, la iathuh ruh hapoh ka iing dorbar ba la wengkam noh shipor ia u Bah Franklin Khymdeit bad halor kane ka jingjia la phah tohkit bad ia ka kaiphot jong kane ka jingtohkit ruh la ioh pdiang da ka department.
Haba ia dei bad kane na ka liang jong ka department mynta ka dang pan jingmut na ki muktiar ha kaba ia dei bad kane ka kam kumno bna leh bad a dien ba la ioh ia ka jingmut na ki muktiar yn sa wanrah sha ka EC bad sha ka iing dorbar ia kane ka kaiphot.
Ka kong Kharpuri kala ong ba, kaba kongsan ka long ba ka EC ka dei ban ioh biang ia kane ka pisa, halor ki jingkylli ba kumno u nongap khlaw u ioh ban pyndon kam bakla kat kane ka pisa, na ka liang jong ka EM kala ong ba ki dang hap ban wat bniah balei kane ka jia kumne.
