Shillong, Iaiong 20: U Bah A Dkhar Vice president jong ka seng UDP, u la ong ba ha kine ki khyndait sngi kum ka party kin sa ia shong ban ia kren halor ka jingleh jong ki saw ngut ki MDC u Bah Teinwell Dkhar, Bah Donkupar Sumer, Bah Albinus Lyngdoh bad u Bah Equator Nongrang ba kila leit ban kyrshan ia ka EC kaba la ialam da u Bah PN Syiem CEM jong ka KHADC.
Shuwa ba ka seng kan shim ia kano ka rai kan khot shuwa ia ki MDC ban ailad ia ki ba kin jubab ha khmat jong ka party bad ha dien ba ka party kala ioh ia ka jubab na ki saw ngut ki MDC kan sha shim ia ka rai la kan beh seng ia ki ne kan dang pdiang ia ki hapoh jong ka seng.
Kumba ka long mynta kiba sngap ia ka rai jong ka party ki don sa tang ar ngut ki MDC u Bah HS Shylla bad ka kong Rona Khyndeit. Na ka liang jong ka party kala shim khia ia kane ka jingleh jong ki MDC ha kaba kim sngap ia ka rai jong ka party ba dei ban weng noh ia ka jingkyrshan na ka PDF ka EC khleh khawlang hapoh jong ka KHADC.
