Shillong, Naiwieng 01: U Director jong ka tnad Ri Mrad u Dr B Rijal u la ong ba shen kim sa sdang noh ban eksamin ia ki masi kiba die ha iew Khanapara bad ia kane ka jingiakren la ia mynjur lang hapdeng ki seng nongot doh bad ki seng bhalang ruh kumjuh.
Ha kane ka jingiakren la don ka jingiamynjur ba ia ki masi kiba la peit bniah da ki doctor yn pyndait da ki Tika ha ka shkhot jong ki masi, hynrei ban pynshisha la ki long kiba lait na ki jingpang yn nym lah hynrei kam iarap ban iada.
Ha ka juh ka por da kaba pyndonkam ia ki tika kan iarap ban iada na ka jingshallan tuh ia ki masi sha Bangladesh. La ong ba na ka liang jong ki nongkhaii masi kila pynpaw ba ki kloi ban siew iaki Tika, hynrei ka dor ka long T.25 tyngka kawei bad mynta kila ioh jingtip ba ki don kiba tang T.15 tyngka.
Kumba ka long mynta na ka liang jong ka ophis ki duna ki doctor hynrei namar kane ka kam kadei kaba ktah ia ka koit ka khiah ki hap ban phah ia ki doctor na kiwei ki jaka namar u doctor ba don ha Byrnihat um lah ban beh sha Khanapara.
Haba ia dei bad kane ka kam la dep ruh ban ia kren bad u DC, SP jong ka Ri Bhoi District ban peit ba kane ka kam kan iaid beit da ka jingiatreilang bad ki nongot doh masi, Kane ka jingeksamin kan long tang ban iada ban lait na ki masi ba la pang eh.
U Dr Rijal u la ong ba lada eksamin ia ki masi ban lap kine ki kiba koit ba khiah katkum ki kyndon kaba ki dei ban bud kan long ha jaka ot doh kam dei ha jaka die, hynrei ia kane kan buh jingeh namar lada hap ban leh ia ka jingeksamin ha ka rukom ka biang ka doh masi kan poi T.1000 tyngka shi kilo ha Shillong. Kane kaba kin sdang mynta ka long tangkum ka jingiada.
