Shillong, Iaiong 22: Ka Khasi Students’ Union Central Executive Council haka 22 tarik u Iaiong 2023 ka lah ioh ban pynskhem Nongkitkam ba thymmai jong ki shnat trei ki jongka kata ka Bangaluru bad Mangalore Unit ki ba don hapoh ka Jylla Karnataka.
U Samla James Hitler Mawphñiang haba ai jingkren ha ba pynskhem iaki Nongkitkam ba thymmai jong kine ki shnat trei u la kren shaphang ka jingroi sted ka pyrthei jingtip lyngba ki kor technology, Artificial intelligence bad ba kumno kane ka jingroi sted ka wanrah iaka jinglip rong iaki mawbyrsiew jong ka jaidbynriew khasi kita ki long ka jing tipkur-tipkha, tipbriew-tipblei bad ka jingkamai iaka hok.
Hapdeng ka pyrthei tynneng iaka ka kolshor ki ri Sepngi (Westernization). Hynrei wat hapdeng kane ka jingroi jong ka pyrthei jingtip ka tynrai jongkano kano ka jaidbynriew ka im bad ieng rasong lada ki dkhot jong ka ki kynmaw ia la ki mawbyrsiew kiba long ki thied snam ka jaidbynriew.
Ha kane ka sngi ka KSU Bengaluru Unit ka lah ioh ban pynlong iaka 3rd Meghalaya Cultural program ha kaba ka Seng ka lah ioh ban pyntian smai syndon iaki ki Nongkitkam ba thymmai ki jong kine ki artylli ki shnat treikam jongka hapoh ka jylla Karnataka ia ki ba lah pynskhem da u Samla James Hitler Mawphñiang u ba long kum u Asst. General secretary ka KSU-CEC.
Hakane ka program u Bah Iada Martin Marbaniang, IPS Officer u ba long ruh u Deputy Inspector General of Police, Bengaluru u lah long kum u Kongsan hakatei ka sngi, bad u Samla Raymond Kharjana, Education Secretary ka KSU-CEC kum u Symbud Kongsan.
Ha kane ka sngi la don lang ryngkat ka jingdon lang jong ka Kong Ngaitlang Mary Tariang i ba long kum i Asst. Professor, jong ka Christ (Deemed) University, Bengaluru, Rev. A. Nongrum, Pastor ba dei peit iaka Khasi Jaiñtia Christian Fellowship (KJCF) Bengaluru, Samla Pynshai Iawphñiaw u ba long u Nongaibuit (Adviser) iaka KSU Bengaluru Unit.
Haba ai jingkren hakatei ka sngi U Kongsan u lah kyntu kynpham iaki Samla pule khasi ba haba ki don ha sorbah Bengaluru kim dei ban dei ban don ka jingsngew iapher dong pher thaiñ para khasi khara bad ban long tylli mlon khnang ban kyntiew ia la ka ktien.
Ka kolshor bad ka jaidbynriew sha kliar ki lum, bad kumjuh u la pynkynmaw ba kum ki samla ka jaidbynriew ki dei ban weng bad rad dyngkhong iaka jingjaituh ka jingsngewmeng bad jingbym sngewiahap kyrdan ban trei iaki kam ba rit ba ria namar kane ka dei ka wei ka lynti ba ngin ioh ban synshar dalade ialade ha baroh ki liang.
U Symbud Kongsan, u la bynrap ba kum ka jaidbynriew, ki Samla khasi watla ki lah jngai nala ing bad ka jingdon ha ka jaka bym iohi shuh ki khmat ki kur ki kha ne ki kmie ki kpa hynrei kim dei ban klet iala ka tynrai bad ka dyngkhong kaba ki wan.
Ka jingithuh iaka jaidbynriew ka dei lyngba ka ktien ba ki kren, kumta u kyntu ba ki samla pule watla ki don jngai na la ing kim dei ban klet iaka ka tynrai bad ka rympei ba ki mih, namar ba ka jingklet noh iakine ki bynta ba kongsan ha ka jingim Khasi kan wanrah iaka jingklumar jingmut bad jingsakma ha ka jingim ka jong ki khun samla ka jaidbynriew.
U Samla Rymphang Nongsiej, u President ba rim ka KSU Benglaru Unit u la pynpynkynmaw iaka jingmutlop iaka Sorkar jylla halor ka jingbym kren shai ka jongka, ba hato kan shna ne kam shna iaka Meghalaya House hapoh Sorbah Bengaluru, kaba ka Seng ka lah dawa naduh u snem 2018.
Hynrei haduh mynta kam don kano kano ka jingpyrshang jongka ban pynurlong iakane ka jingdawa na ka Seng, shuh shuh u la bynrap ba ka Jylla Karnataka ka dei ka jylla kaba bun tam ki Khasi ki ba trei bad kum juh ki ba pule haba ia nujor bad kiwei ki pat jylla ka Ri India, hynrei na kadaw ka jingbym don ka Meghalaya House ka lah wanrah jingeh khamtam ia ki Samla Pule kiba wan shakane ka Sorbah.
Hakane ka sngi lah ioh iaka jingshim bynta na shi bun ki samla ki ba don ha sorbah Bangaluru ban pyni iaki jingshad jingrwai tynrai jong ka jaidbynriew Khasi ka jongngi.
