Shillong, Jylliew 22: Ka Hima Mylliem kala pynpaw ia ka jingsngewnguh ia ka sorkar bad ia ka KHADC ha kaba kila shah ban plie biang ia ki Iewduh wat la ka dang long tang katto katne ki dukan, kata 413 tylli ha ka shisngi bad ha ka shitaiew ki long 1222 tylli kumba la buh dak.
U Myntri Langstieh u wei na ki myntri ka Hima Mylliem haba kren ha u SP News Agency u la ong ba ka jingdon ki pulit jong ka Hima bad kum juh ki enforcement jong ka KHADC kumba ka long mynta kila lah ban peit namar ki briew kila sngewthuh ban but ia ki kyndon kiba la buh da ka sorkar.
Kum ka Hima kam lah khlem da pynpaw ia ka jingsngewnguh ia ka sorkar, u Myntri Rangbah ka jylla u Conrad K Sangma, bah Prestone Tynsong symbut myntri rangbah ka jylla, ka Executive Committe jong u bah Titosstarwell Chyne jong ka KHADC ba kila shah ban plie ha dien ba la khang ia ka iew lai bnai lynter.
U Myntri Kharlukhi u wei na ki myntri hapoh ka Hima u la pynpaw ia ka jingsngewnguh ba la ioh ban sdang biang ia ka iew wat la ka dang long tang khyndait ki dukan, kane ka long kum ka jingsdang bad na ka liang jong ka hima kin dang ia kren bad ka sorkar ban peit lada ka long ban plies a ia kiwei ki jait dukan ruh kiba dang shah khang mynta.
U Myntri Nongdhar u la kyntu ia ki nongshong dukan bad kum juh ia ki nongwan iew ba kin ia but ia ka jingbthah kaba la buh da ka sorkar bad kum juh na ka liang jong ka hima haba wan siew an tda ha Iewduh, kane ka dei ka sngi ba dang shu sdang plie ia ka bad kyrmen ba kan don ka jingiatreilang na baroh ki liang.
