Jowai, Kyllalyngkot 09: Ki samla pule ka Kiang Nangbah Govt College ki la pynpaw iaka jingsngewsih kthang namar ka jingpynslem ka sorkar jylla ban pyllait ia ka Scholarship ne ka bai ai jingiarap sha ki samla pule kaba dei ka bhah kyrpang na ka bynta jong ki.
Ki samla pule kiba wan na ka longing kaba duk kila mad ia ka jingeh kaba khraw naba kim kot bor ban thied ia ki kot pule ruh na ka daw ba ka sorkar ka pynslem ia katei ka Scholarship.
U Samla Justice Paul Lyngdoh General secretary ka KNGCSU u la ong ba ka jingsohsat ba ki samla pule kane ka jylla ki ia kynduh kam dei shuh kaba malu mala naba ka jingshah set ka Scholarship jong ki ka la long naduh ki snem 2011 ter ter.
U lah ong ruh ba kim shym la ioh shuh ia ka Post Matric Scholarship naduh u snem 2014-2015, 2015-2016 bad haduh mynta kumjuh u la ong ba kito ki samla pule kiba sah ha khappud kiba dei ban ioh ia ka Border Area Scholarship kim shym la ioh shuh ia katei ka bhah jong ki naduh u snem 2011 ter ter haduh mynta kumjuh ka Minority Scholarship kaba ju wan lyngba ka North Eastern Council (NEC) bad ka daw la ong ba haba iakren bad ki katto kattne ki heh sorkar ki ong ba ka dei namarba ka sorkar jylla kam don pisa ban bei tang ia ka 10% ruh.
Mynshuwa kata shuwa u 2013 ki samla pule ki ju ioh thikna ia ka Minority Scholarship lyngba ka NEC naba la bei tyngka shispah na ka shispah da ka sorkar pdeng hynrei naduh u 2013 pat la pynkylla noh ha kaba la pynbeit ba 90% yn bei da ka sorkar pdeng katba 10% pat yn bei da ka sorkar jylla.
Naduh ba la pyntreikam ia katei ka rukom pyniaid thymmai naduh u snem 2013 bad naduh utei u snem hi haduh mynta ki samla pule kim pat ioh ioh pdiang shi naia ruh ia katei ka Scholarship bad ki la iathuh ba ki la ioh jingtip ba ka daw ka dei namarba ka sorkar jylla kam lah ban bei tyngka tang ia ka 10% ruh. katei ka jingsahkut ka Scholarship ki samla pule ka la long salonsar ha baroh kawei ka jylla.
Tharai ngin hap ban khot noh daka Joint Action Commitee ha baroh ki school bad College ki ba don ha kane ka Jylla ban iakren halor kane ka phang ioh lehse ngi la hap ban iamih paidbah ban pynkynmaw iaka Sorkar Meghalaya ban khmih sha kane ka phang kaba ngi kum ki samla pule ngi donkam bad ia kaba ngi dei hok ban ioh.
