Shillong, Jymmang 09: U Hymmen, u para, u paralok bad u samla uba ju ia don ryngkat lang bad ka seng ha ki por kiba kmen bad kiba sngewsih. U samla rangbah u ba don ka jingkitkhlieh, u samla uba shit rhem bad u samla uba ju ia tynrong lang ia ka khia ka shon, ka iap ka im jong ka Jaidbynriew, ka shnong ka thaw bad ka imlang ka sahlang. Kine ki long ki jingkynmaw bad jingpyrto ba khmat eh ba ki dkhot ka KSU North Khasi Hills District Unit bad ka Nongpoh Circle ki sngew ia u samla Sabathani Lyngdoh (bam kwai ha dwai u Blei).
Lyngba kane ka kyrwoh ka KSU North Khasi Hills District Unit bad ka KSU Nongpoh Cirlce ki pynpaw ia ka jingsngewdiaw bad sngew tmang kaba khraw shikatdei eh halor ka jingkhlad noh jong u samla Sabathani, u samla uba long uwei na ki nongkitkam ba shitrhem jong ka seng. U samla Sabathani u long u Assistant Office Secretary ka KSU Nongpoh Circle bad u bat ruh ia ka kam President jong ka KSU Mawdiangum Unit.
U lyoh uba dum ngain u la wan kah ia ka seng ha ka 08 tarik u Jymmang 2018, ka sngi kaba une u samla u la leit noh na kane ka sla pyrthei. Ha kum kane ka por ka seng ka kynmaw ieid ia ki jingnoh synniang ki jong une u samla ha ki kam shakri ia ka Jaidbynriew lyngba ka KSU khlem da khein ne thew wat tang khyndiat ruh ia lade.
Ka seng ka kynmaw burom ia ka jingaiti kaba kloi ka jong une u samla dap shynrang uba la kloi ban shong ha along na ka bynta ban long waitlam bad stieh ia ka Jaidbynriew ha ka por ba ki bor kiba na shabar ki thmu ban thombor ia ka Jaidbynriew ba rit paid ka jong ngi. Ma u lem bad kiwei ki para samla khlem ka jingtieng bad jingriej ki la shong saja ha along tang ban pynthikna ba ka lawei jong ka Jaidbynriew bad ki pateng ki ban wan kan long ka lawei kaba phyrnai bad kaba lait na ki jingshah thombor bad shah iuh roit.
Ka KSU North Khasi Hills District Unit bad ka KSU Nongpoh Circle ki phah ia kane ka khubor sngewlem sha ka iing ka sem jong une u samla uba la long shi iing shi sem ha ka seng. Ka seng kan iai don ryngkat bad ka iing ka sem ka jong u ha kano kano ka por ba donkam.
