Shillong, Naiwieng 22: U Bah HS Shylla MLA barim jong ka Nongkrem Contituency mynta ka sngi u la thep ia ka Nomination paper ban ia khun ia ka MDC election shiteng samoi na kane ka konstitwensi kum u kyrtong jong ka party UDP.
Haba kren ha ki nongthoh khubor ha dien ba la dei ban thep ia ka nomination paper ne u rangbah u ba la long teng ruh u CEM jong ka KHADC u la ong ba ka jingiakhun ka jong u ka long halor ki san tylli ki nongrim kiba u la juh kren na ka por sha ka por bad kaba kongsan eh ka long ban weng noh ia ka Meghalaya Compulsory Registration Marriage Act kaba la pass da ka iing dorbar thawain jong ka jylla.
U bah Shylla u la kynthoh ba ia kane ka ain la leh da ka sorkar Congress bad la kyrshan da ka seng HSPDP, ka ain kaban wanrah ia ki jingeh ia ki samla kiba ia poi kha poi man ha ka burom ka akor namar ba ki hap ban register ia kane ka jingiathoh ka jong ki bad kane kan ktah ia ki paidbah jong ka jylla.
U la ong ruh ba katkum katei ka ain ba lada ki khun samla kiba la iathuh hapoh ki balang kim leit ban register hapoh ka hynriew bnai kin sah kem bad set phatok ia ki shijur bad kane ka long kaba ma, u la ong ba kumno ka seng Congress bad ka HSPDP ka kyrshan ia kum kane ka jaid ain imat kila shu soi khlem da peit bniah.
