Shillong, Nailur 20: Kat and pynroi sor jog ka sorkar jylla kala don ka jingthmu ban aiti biang noh ia ka Jowai Municipal Board sha ka Jaintia Hills Autonomous District Council (JHADC). Na ka liang jong ka tnad pynroi sor kala ai jingmut sha ka sorkar bad ka sah mynta ka long ha ka sorkar ba kin shim ia ka rai
Katkum ki thymmei khubor kiba la ioh da u SP News Agency, ka daw ba ka sorkar ka kwah ban aiti noh biang ia ka JMB sha ka JHADC ka daw ka long ba ki briew jong ka sor Jowai kim pdiang ia ki kam kiba bun kiba ka sorkar ka kwah ban leh bad ha ka juh ka por kin kloi ruh ban siew ia ki khajana kiba ka municipal ka dei ban shim na ki nongshong shnong.
Kumba ka long mynta ka JMB ka don ha pdeng ka jingeh kaba khraw, tang ban pynmih pisa naka bynta ban siew ia ki nongtrei kiba don hapoh jong kane ka board ruh kam lah bad mynta ki nongtrei la shiphew bnai kim shym la ioh ia ka tulop ka jong ki.
U Bah Thombor Shiwat Chief Executive Member jong ka JHADC, u la ong ba ha duh mynta na ka liang jong ka JHADC kam pat ioh shithi ei ei ruh em na ka sorkar halor kane ka jingthmu jong ka sorkar ban aiti noh biang ia ka JMB sha ka JHADC. La ong ba lad aka poi ka shithi kin sa ia kren hapoh jong ka Executive Committee.
