Shillong, Naitung 04: Ki seng bhalang jong ka South West Khasi Hills District hapoh jong ka lama Joint Action Committee of Social Organisation , South West Khasi Hills District (JACSO), kala thoh sha u MP jong ka Shillong Parliamentary seat u Bah Vincent H Palat ban bishar bniah shu wa ba un leit pan jing pynshai halor ka jingthmu ban shna pynheh ia surok Nongstoin-Pambriew-Wahkaji- Mawthabah.
Kane ka dei ka shithi kaba la phah da ka Joint Action Committee of Social Organisation , South West Khasi Hills District (JACSO), ka kynhun iasynrop lang jong ki sengbhalang bapher bapher hapoh ka South West Khasi Hills District kum ka SSSS, HYC, FKJGP, HNYF,HANM , WKSU, MIYF, SPDF, SWKYF bad kiwei de, ngi sngew ban pynsngew bad kyrpad na phi halor kine ki mat harum;
Ba na ka liang jong kitei ki seng kila ioh jingtip ba ka don ka jingthmu jong ka Ministry of Road Transport and Highway, Government of India lyngba ka Special Accelerated Road Development Programme for North East (SARDP-NE) ban pynneh ia surok Nongstoin-Pambriew-Wahkaji- Mawthabah sha ka Two Lane, ka jingthmu jong kane ka surok kumba ka lapaw ha ka Notification jong ka Ministry of Road Transport and Highway, Government of India kaba 5.7.2010 kalong na bynta ka jingpynbit pynbiang ia ka surok ban tieh ia u Marpoh Khyndew Uranium na ka thain Mawthawbah, South West Khasi Hills District.
Kane ka kynhun sengbhalang kala krenshai ba kum ka kynhun synroplang jong ki seng bhalang ngi ieng halor ka nongrim ban pyrshah ia kino kino ki jingthmu tih uranium na ka Bri U Hynniewtrep, ngi sngew ban pynpaw ba ngi pyrshah jur ia kane ka jingthmu shna surok ban tih Uranium ha ki thain Mawthabah. La ong “Hooid ngi pdiang ia kino kino ki kam pynroi hynrei kane ka surok kumba ka paw kam dei nabynta ka jing pynroi ia ka thain Umdohlun-Mawthabah hynrei nabynta ban tih beit ia u Marpoh kyndew u Uranium”.
Kane ka kynhun kala ong ba ba ki ladon katto katne ki kynhun bad ki Company, kiba la pynsngewthuh bakla sha ki paidbah ba ia kane ka surok la shna ym na bynta ban tih uranium . kumta, kum ka kynhun kila sngewdei ban ong ba ki don kam ka jing iashai ba tikna bha halor kane ka jingthmu shna ia katei ka surok bad ka don kam ka jing pan jingpynshai na ka Sorkar India bad ka Sorkar Meghalaya ia ka jingthmu jong ka tei ka surok Double Lane Nongstoin-Pambriew-Wahkaji- Mawthabah.
Ba kumba ka long mynta ban shna pynheh ia katei ka Surok ka sorkar India bad ka Sorkar Meghalaya ka don kam ia ka NOC na ka office jong ka KHADC. Khlem ka ka NOC jong ka KHADC kim lah satia ban shna pynneh ia katei ka Surok khamtam eh na Wahkaji sha Mawthabah.
Halor kine ki mat, kila sngewdei ban kyrpad ia u MP bay n ienglang ban halor ka nongrim ban pyrshah tih Uranium ha poh ka Bri U Hynniewtrep da kaba yn bishar bniah shuwa ban kyrshan ne pyrshah ban shna pynneh ia katei ka surok. Na ka liang jong kitei ki seng bhalang ki kyntu bana ka liang jong u kum u MP u dei ban leit ban pan jingpynshai na ka Sorkar India lyngba ka ophis jong u Prime Minister, Na ka Ministry of Road Transport and Highway, Government of India, Na ka Uranium Corporation of India Limited (UCIL) bad kumjuh ruh na ka Sorkar Meghalaya lyngba ka Chief Minister Office ia ka jingthmu ba tikna bad ba shisha jong katei ka Surok Double lane bad hato ka Sorkar India bad ka Sorkar Meghalaya ka don jingmut ne em ban khlong ia u Marpoh kyndew ha Wahkaji- Umdohlun- Domiasiat , bad ha kiwei de ki jaka hapoh ka Bri U Hynniewtrep.
Na ka liang jong kitei ki seng ki khmih lynti ba ki jingshai jong kine ki office harum kin long lyngba ki Public Notice. Na ka liang jong kitei ki seng bhalang ki kyrmen skhem ba u MP un pdiang ia kane ka jingdawa ka jong ki, ia kane ka shithi la sign da u Chairman jong ka JACSO.
